Koronavırýs: BQO-da sońǵy tirkelgen eki turǵyn Reseıden kelgen
ORAL. QazAqparat – Batys Qazaqstan oblysynda 11-12 sáýir kúnderi koronavırýs juqpasymen tirkelgen eki turǵyn Reseıden kelgen bolyp shyqty. Bul týraly brıfıngide BQO taýarlar men kórsetiletin qyzmetter sapasy men qaýipsizdigin baqylaý departamentiniń basshysy Muhamǵalı Aryspaev málim etti, dep habarlaıdy QazAqparat tilshisi.
M.Aryspaevtyń aıtýynsha, olardyń ekeýi de – Máskeý qalasynda jumys istep, elge oralǵan oblys turǵyndary.
Saratov oblysy arqyly kelgen atalǵan qos turǵynnan «Tasqala» avtoótkelindegi sanıtarlyq-karantındik beketten ótken kezde dene qyzýy bar ekendigi anyqtaldy. Sodan keıin Oraldaǵy provızorlyq gospıtalǵa jetkizilip, koronavırýsqa shaldyqqany belgili bolǵan soń oblystyq Juqpaly aýrýlar aýrýhanasyna jatqyzyldy.
Bul ekeýiniń qasynda taǵy alty jolaýshy bolǵan. Olardan koronavırýsqa alynǵan synama teris nátıje kórsetti. Qazirgi kezde karantındik statsıonarda jatqan bul turǵyndar sodan keıin 14 kún boıy úılerinde baqylanady.
Osylaısha BQO-da naýqastar sany 8-ge jetti. Olardyń jeteýi Reseıden kelgen bolsa, bireýi – Atyraýdan oralǵan Oral qalasynyń turǵyny.
Bularmen qarym-qatynasta bolǵan 79 adamnyń bári úılerinde oqshaýlandy.
«Óńirde Reseımen shekarada oryn tepken «Tasqala», «Syrym», sondaı-aq Aqsaı qalasy (Bórli aýdany) jáne Jánibek aýdanyndaǵy avtoótkelderdegi sanıtarlyq-karantındik beketterde baqylaý jumystary kúsheıtilgen. Oǵan qosa tranzıttik júk kólikteri Oral qalasyna kirmeı, aınalyp ótedi. Munyń bári indetti oblysqa kirgizbeı, aldyn alý maqsatynda jasalýda», dedi M.Aryspaev.
Eske sala keteıik, budan buryn karantınge tap bolǵan qostanaılyq azamattyń batysqazaqstandyq dárigerlerge alǵys bildirgenin, BQO-da 100-den astam adamnyń karantınde jatqanyn jazǵan bolatynbyz.
