Koronavırýs: BQO-da sońǵy tirkelgen eki naýqastyń biri Reseıden kelgen
ORAL. QazAqparat – Batys Qazaqstan oblysynda koronavırýs indetin juqtyrǵan sońǵy eki naýqastyń bireýi Reseıden kelgen, dep habarlaıdy QazAqparat tilshisi.
Aıta keteıik, óńirde ınfektsııany juqtyrýdyń jańa oqıǵalary 13 sáýir kúni anyqtalǵan bolatyn.
BQO shuǵyl shtabynan málim etkenindeı, olardyń ekeýi de – áıelder, 46 jáne 38 jastaǵy oblys turǵyndary.
Olardyń biri Reseıden kelgen. «Tasqala» avtoótkelinde sanıtarlyq-karantındik beket qyzmetkerleri tekserip, saýalnama júrgizgen kezde eshqandaı shaǵymy bolmaǵan. Sodan keıin bas memlekettik sanıtarlyq dárigerdiń bıylǵy 9 sáýirdegi №32 qaýlysyna sáıkes zerthanalyq tekserý úshin karantındik statsıonarǵa jiberildi.
Ekinshi áıel budan buryn koronavırýs anyqtalǵan medıtsına qyzmetkerimen qarym-qatynasta bolǵan.
Dıagnostıkalyq zertteýler qorytyndysymen eki áıelde de COVID-19 tabylǵannan keıin, olar oblystyq juqpaly aýrýlar aýrýhanasyna jatqyzyldy.
Naýqastarmen baılanysta bolǵan adamdar anyqtalý ústinde. Aýrý oshaqtarynda dezınfektsııalyq jumystar júrgizildi.
Osylaısha óńirde aýyrǵandar sany 11-ge jetti, olardyń bireýi jazylyp shyqty.
Eske sala keteıik, budan buryn Oralda medıtsına qyzmetkeriniń koronavırýs juqtyrǵanyn, óńirde indetpen kúresip jatqan 215 medıtsına qyzmetkerine 22,6 mln teńge somasyna syıaqy tólengenin jazǵan bolatynbyz.
Sońǵy málimetter boıynsha, BQO-da naýqastar sany 11-ge jetti.
