Koronavırýs: BQO-da sońǵy tirkelgen eki naýqas ta Reseıden kelgen
ORAL. QazAqparat – Batys Qazaqstan oblysynda koronavırýs juqtyrǵan eki naýqas ta Reseıden kelgen bolyp shyqty, dep habarlaıdy QazAqparat tilshisi.
BQO-nyń shuǵyl shtaby málim etkenindeı, bulardyń ekeýi de – oblys turǵyndary.
Olar budan buryn koronavırýs anyqtalǵan naýqaspen birge Reseıden kelgen.
Zertteý qorytyndysymen COVID-19 dıagnozy rastalǵannan keıin ekeýi de oblystyq juqpaly aýrýlar aýrýhanasyna jatqyzyldy. Qazirgi tańda jaǵdaılary qanaǵattanarlyq.
Naýqastarmen qarym-qatynasta bolǵan adamdar anyqtalyp, barlyǵy medıtsınalyq baqylaýǵa alynýda.
Aýrý oshaqtarynda epıdzertteý jáne dezınfektsııa jumystary júrgizilýde.
Osylaısha BQO-da syrqattanǵandar sany 20-ǵa jetti, olardyń bireýi jazylyp shyqty.
Eske sala keteıik, BQO-da koronavırýs Reseıde jumys istep kelgenderden anyqtalǵanyn, Oral qalasynda avtobýstar qatynasy toqtatylatynyn jazǵan bolatynbyz.
