Koronavırýs: BQO-da sońǵy tirkelgen 6 turǵynnyń beseýi – Reseıde jumys isteıtinder
ORAL. QazAqparat – Batys Qazaqstan oblysynda sońǵy tirkelgen 6 turǵynnyń beseýi – Reseıde jumys isteıtinder, dep habarlaıdy QazAqparat tilshisi.
Búgin tańǵy 09.30-daǵy málimet boıynsha Batys Qazaqstan oblysynda 6 adamnyń koronavırýs juqtyrǵany belgili boldy.
Memlekettik komıssııanyń shuǵyl shtabynan alynǵan málimetke qaraǵanda, sonyń beseýi – Reseıde vahtalyq ádispen jumys jasaıtyn azamattar, bulardyń úsheýi – BQO-nyń, ekeýi – Túrkistan oblysynyń azamattary.
Saratov oblysymen shektesetin «Tasqala» avtoótkelinen ótken kezde olardyń densaýlyǵyna shaǵymy bolmaǵanmen, karantındik statsıonarǵa jatqyzyldy. Zerthanalyq synama alynǵanda, koronavırýsqa shaldyqqany anyqtaldy.
Taǵy bir adam – Oral qalasynyń 54 jastaǵy turǵyny. Ol buryn aýyrǵan adammen qarym-qatynasta bolǵandyqtan, karantındik statsıonarǵa jatqyzylyp, synama alynǵan.
Qazirgi tańda altaýy da oblystyq juqpaly aýrýlar aýrýhanasynda em alýda.
Osylaısha oblysta aýyrǵandar sany 92-ge jetip, sonyń ekeýi jazylyp shyqty. Bulardyń 78-i – Reseıden kelgender.
Eske sala keteıik, budan buryn BQO-da sońǵy tirkelgen 10 naýqastyń 9-y Reseıden kelgenin, oraldyq eriktilerdiń jalǵyzbasty ananyń úıin jóndep bergenin jazǵan bolatynbyz.
