Koronavırýs: BQO-da sońǵy tirkelgen 10 naýqastyń 9-y Reseıden kelgen
ORAL. QazAqparat – Batys Qazaqstan oblysynda sońǵy tirkelgen 10 naýqastyń 9-y Reseıden kelgen, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń brıfıngte málim etkenindeı, naýqastardyń biri buryn koronavırýspen aýyrǵan adammen qarym-qatynasta bolǵan.
Qalǵan 9-y – Reseıde vahtalyq ádispen jumys jasaıtyn turǵyndar. Olar Saratov jáne Samara oblysymen shektesetin «Tasqala» men «Syrym» beketterinen ótkennen keıin karantındik statsıonarǵa jatqyzylǵan. Sodan keıin synama alynǵan kezde koronavırýs juqtyrǵany anyqtaldy.
Qazirgi kezde on adam da oblystyq juqpaly aýrýlar aýrýhanasynda tıisti emderin alýda.
Aýrý oshaqtarynda dezınfektsııalyq jumystar tolyǵymen júrgizildi.
Osylaısha oblysta aýyrǵandar sany 86-ǵa jetip, sonyń ekeýi jazylyp shyqty. Sonyń basym kópshiligi (73-i) –Reseıden kelgender.
«Qazirgi tańda úılerinde oqshaýlanyp jatqan turǵyndar az emes. Olar bólek bólmede turyp, jeke bas gıgıenalaryn qatań saqtaı bilýleri kerek. Ydys-aıaqtary da bólek bolady. Bólmeniń ishin álsin-álsin jeldetip, tańmen jáne keshte qyzýlaryn ólsheıdi. Olardyń jaǵdaıyn medıtsına qyzmetkerleri bilip turady. Oqshaýlanǵan adamdarmen birge turatyn otbasy músheleri de saqtyq sharalaryn umytpaýy tıis», dedi N.Mustaev.
Eske sala keteıik, budan buryn Oralda kásipker qyz-kelinshekterdiń kópbalaly analarǵa qolushyn sozǵanyn, BQO-da Reseıden kelgen stýdentten koronavırýs anyqtalǵanyn jazǵan bolatynbyz.
