Koronavırýs: BQO-da sońǵy anyqtalǵan tórt naýqastyń úsheýi Reseıden kelgen
ORAL. QazAqparat – Batys Qazaqstan oblysynda koronavırýs juqtyrǵan sońǵy tórt naýqastyń úsheýi Reseıden kelgen, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń brıfıngte málim etkenindeı, bulardyń ekeýi – Qyzylorda, bireýi – Batys Qazaqstan oblysynyń turǵyny.
Úsheýi de Samara oblysymen shektesetin «Syrym» beketinen ótkennen keıin karantındik statsıonarǵa jatqyzylyp, zerthanalyq synama alynǵan kezde koronavırýs anyqtalǵan.
Taǵy bir adam – oblys turǵyny. Ol buryn koronavırýs juqtyrǵan azamatpen qarym-qatynasta bolǵandyqtan, karantındik statsıonarǵa jatqyzylǵan. Sodan keıin onyń da dertke shaldyqqany belgili boldy.
Qazirgi kezde bári de oblystyq juqpaly aýrýlar aýrýhanasynda tıisti emderin alýda.
Aýrý oshaqtarynda dezınfektsııalyq jumystar júrgizildi.
Osylaısha BQO-da aýyrǵandar sany 68-ge jetip, sonyń ekeýi jazylyp shyqty.
«Áleýmettik jelilerde turǵyndar Reseıden kelgenderdi shekaradan nege ótkizedi? degen saýaldy jıi qoıyp jatady. Buǵan aıtarymyz, Reseıden kelip jatqandardyń barlyǵy – Qazaqstan azamattary, kópshiligi – oblys turǵyndary. Keıbireýleri jumyspen, bireýleri densaýlyǵyna baılanysty em alýǵa jáne basqa jeke sebeppen baryp, qaıtyp jatqandar. Olar shekaradan ótken boıda karantındik statsıonarǵa jatqyzylyp, bárinen synama alynady. Koronavırýs juqtyrǵandar sol boıda oblystyq juqpaly aýrýlar aýrýhanasyna jetkiziledi. Aýyrmaǵandaryna qolhat berilip, úılerine jiberiledi. Bular 14 kún boıy medıtsınalyq baqylaýda bolady. Qazirgideı tótenshe jaǵdaı kezinde turǵyndardyń úılerinen shyqpaı, barlyq qaýipsizdik sharalaryn saqtaýy asa mańyzdy», dedi N.Mustaev.
Eske sala keteıik, budan buryn BQO-da koronavırýs juqtyrǵan naýqastyń Shymkent turǵyny ekendigin jazǵan bolatynbyz.
