Koronavırýs: BQO-da sońǵy anyqtalǵan 4 naýqastyń úsheýi – sheteldikter
ORAL. QazAqparat – 6 mamyr kúngi sońǵy málimet boıynsha, Batys Qazaqstan oblysynda koronavırýs juqtyrǵan taǵy 4 adam anyqtaldy, dep habarlaıdy QazAqparat tilshisi.
BQO ákimdiginen túsken málimetke qaraǵanda, olardyń bireýi – Reseıde vahtalyq ádispen jumys isteıtin Túrkistan oblysynyń 27 jastaǵy turǵyny.
Qalǵan úsheýi – júk tasymalymen aınalysatyn Tájikstan men Qyrǵyzstannyń 33, 44 jáne 57 jastaǵy azamattary. Reseımen shektesetin «Syrym» avtoótkelinen ótý barysynda olar densaýlyqtaryna shaǵymdanbaǵan. Alaıda bas memlekettik sanıtarlyq dárigerdiń bıylǵy 30 sáýirdegi №35 qaýlysyna sáıkes, júk tasymaldaýshylarǵa ekspress dıagnostıka jasalǵan kezde, analız oń nátıje kórsetken. Keıin jedel járdemmen karantındik statsıonarǵa jetkizilgen.
«PTR-dıagnostıkalyq zertteý qorytyndysymen COVID-19 dıagnozy naqtylanyp, tórteýi de oblystyq juqpaly aýrýlar aýrýhanasyna ornalastyryldy.
Naýqastarmen qarym-qatynasta bolǵandar medıtsınalyq baqylaýǵa alynyp, aýrý oshaqtarynda dezınfektsııalyq jumystar júrgizildi.
Іndetke qarsy kúres jalǵasýda», - delingen aqparatta.
Búginge deıin BQO-da aýyrǵandardyń jalpy sany 203-ke jetip, sonyń 41-i saýyǵyp shyqty.
Eske sala keteıik, budan buryn Batys Qazaqstan oblysynda emdelip shyqqan bes adamnyń ekeýi Semeı men Taraz turǵyny ekendigin, BQO ákimi koronavırýspen kúresip jatqan dárigerlermen onlaın-keńes ótkizgenin jazǵan bolatynbyz.
