Koronavırýs: BQO-da sońǵy anyqtalǵan 4 naýqastyń úsheýi Reseıden kelgen
ORAL. QazAqparat – Batys Qazaqstan oblysynda koronavırýs juqtyrǵan sońǵy 4 naýqastyń úsheýi Reseıden kelgen, dep habarlaıdy QazAqparat tilshisi.
BQO ákimdiginen túsken málimetke qaraǵanda, olar – 1998, 1990 jáne 1977 jylǵy oblys turǵyndary.
Reseımen shektesetin «Syrym», «Aqsaı» avtoótkelderinen ótken kezde bireýinen basqasynda densaýlyqtaryna shaǵymy bolmaǵan. Áıtse de algorıtmge sáıkes jedel járdemmen karantındik statsıonarǵa jatqyzylyp, zerthanalyq synama alynǵanda, koronavırýs anyqtaldy.
Aýrý juqtyrǵan 4 adamnyń biri – Atyraý oblysyndaǵy Teńiz ken ornynda jumys jasaıtyn 1999 jylǵy turǵyn.
Olardyń barlyǵy oblystyq juqpaly aýrýlar aýrýhanasyna ornalastyryldy.
Naýqastarmen qarym-qatynasta bolǵandar medıtsınalyq baqylaýǵa alynyp, aýrý oshaqtarynda dezınfektsııalyq jumystar júrgizildi.
Osylaısha BQO-da aýyrǵandar sany 198-ge jetip, sonyń 36-sy saýyǵyp shyqty.
Eske sala keteıik, budan buryn Batys Qazaqstan oblysynda sońǵy tirkelgen úsh naýqastyń Teńiz ken ornynda jumys isteıtinin, sodan kelgen taǵy tórt turǵynnan koronavırýs anyqtalǵanyn, bes adamnyń emdelip, úıine oralǵanyn jazǵan bolatynbyz.
