Koronavırýs: BQO-da myńnan astam adam úıden baqylanýda
ORAL. QazAqparat – Batys Qazaqstan oblysynda 1092 adam úıden baqylanýda, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń aıtýynsha, sondaı-aq 100 adam statsıonarlyq karantınde jatyr.
Sonyń ishinde oblystyq juqpaly aýrýlar aýrýhanasynda em alyp jatqan eki naýqastyń jaǵdaıy qanaǵattanarlyq.
«Kýmyska» provızorlyq gospıtalynda 57, Báıterek aýdanynda 13 jáne «Ivýshka» karantındik statsıonarynda 28 adam bar. Báriniń de jaǵdaıy qanaǵattanarlyq. Kún saıyn medıtsınalyq baqylaý júrgizilýde.
«Qazir oblys ortalyǵynda emdelip jatqan naýqas áıeldiń 24 naýryz kúni Oraldan Aqsaıǵa Ford Transit avtokóligimen barǵandyǵy belgili boldy. Onymen birge bolǵan júrgizýshi men úsh jolaýshy anyqtaldy. Qalǵandary izdestirilý ústinde», dedi Nurlybek Mustaev.
BQO TJ departamenti bastyǵynyń orynbasary Aqylbek Ahmetjanovtyń sózine qaraǵanda, qazirgi tańda alańdar men kóshelerdi, bılbord, avtobýs aıaldamalaryn dezınfektsııalaý jumystary júrgizilýde. Buǵan departamentten 132 adam, 36 tehnıka jumyldyrylǵan. Olar sý ótkizbeıtin kombınezondarmen, aspaly órt sóndirý quraldarymen qamtamasyz etilgen.
«30 naýryz kúni Samaradan 57 stýdent kelgen bolatyn. Olardyń qaıda ekendigin únemi baqylap turý úshin telefondaryna mobıldik qosymsha ornatyldy», dedi A.Ahmetjanov.
N.Mustaev stýdentterdiń bir kún karantındik baqylaýda bolǵannan keıin úılerine jiberilgenin jetkizdi.
Eske sala keteıik, budan buryn Oralda koronavırýspen kúres sharalaryna 94 mln teńge bólingenin jazǵan bolatynbyz.
