Koronavırýs: BQO-da kóshpeli egý brıgadalary jumys jasap jatyr
ORAL. QazAqparat – Batys Qazaqstan oblysynda jyljymaly egý brıgadalary da jumys jasap jatyr, dep habarlaıdy QazAqparat tilshisi.
BQO Densaýlyq saqtaý basqarmasynan málim etkenindeı, kúni búginge deıin óńirde 23540 adam vaktsınanyń І komponentimen egildi.
Sonyń ishinde 5603-i – medıtsına qyzmetkeri, 4271-i – pedagog, 1777-si – quqyq qorǵaý organdary, 11889-y – basqa sala ókilderi.
Sonymen qatar 4726 adam vaktsınanyń ІІ komponentin qabyldap úlgerdi.
9 sáýir kúni túsken 14 myń dozadan (І komponent) 13390 adam (95,6 paıyz) vaktsına aldy.
«Oblys boıynsha 30 medıtsına mekemesinde egý kabınetteri ornalasqan. Oǵan qosa qala emhanalarynda kóshpeli egý brıgadalary uıymdastyryldy. Bul brıgadalar medıtsına pýnkti, egý kabıneti bar mekeme-kásiporyndarǵa baryp, qyzmetkerlerin egedi. Sondaı-aq aýyl halqyn da kóbirek qamtý úshin aýdandarda uıymdar men alys eldi mekenderge baratyn jyljymaly egý brıgadalary jumys isteýde», dep habarlady vedomstvodan.
Eske sala keteıik, budan buryn Batys Qazaqstanda bir táýlikte 205 adamnan koronavırýs anyqtalǵanyn, 624 naýqastyń ınfektsııalyq statsıonarda jatqanyn jazǵan edik.
