Koronavırýs: BQO-da ınfektsııalyq statsıonarlar 53,8% tolǵan

ORAL. QazAqparat – Batys Qazaqstan oblysynda 751 tósektik 14 ınfektsııalyq statsıonarda koronavırýs juqtyrǵan 404 naýqas emdelýde, dep habarlaıdy QazAqparat tilshisi.

BQO Densaýlyq saqtaý basqarmasynan málim etkenindeı, qazirgi kezde aýrýhanalar 53,8 paıyzǵa tolǵan.

Sonyń ishinde Oral qalasynda 578 tósektik 8 statsıonarda 379 adam (65,5 paıyz) em alýda.

Jansaqtaý bólimshesindegi 22 naýqastyń 20-sy – aýyr, ekeýi asa aýyr halde. Bulardyń ekeýi ınvazıvti jasandy tynys alý apparatyna, tórteýi ınvazıvti emes qurylǵyǵa, 16-sy ottegi kontsentratoryna qosylǵan.

Jyl basynan beri 8 518 adamnan koronavırýs anyqtalsa, sonyń 855-i – oqýshylar.

Bıyl 15 adam indetten kóz jumdy.

Basqarmadan túsken málimetke qaraǵanda, 267 995 adam (egilýge jatatyn turǵyndardyń 64,6 paıyzy) vaktsınanyń birinshi, 251 083-i (60,5 paıyzy) ekinshi komponentimen egildi.

Sondaı-aq oblys boıynsha 48 076 adam revaktsınatsııadan ótti. 9 193 adam Pfizer vaktsınasyn qabyldasa, sonyń 326-sy – júkti, 4 110-y – bala emizetin áıelder, 4 757-si – jasóspirimder.

Eske sala keteıik, budan buryn Batys Qazaqstan oblysynda 3400-den astam adam ambýlatorııalyq deńgeıde em alyp jatqanyn jazǵan bolatynbyz.