Koronavırýs: BQO-da barlyǵy 78 aýrý oshaǵy anyqtaldy
ORAL. QazAqparat – Batys Qazaqstan oblysynda koronavırýs tirkelgennen beri barlyǵy 78 aýrý oshaǵy anyqtalyp otyr, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń brıfıngte málim etkenindeı, aýrý oshaqtary Oral qalasymen qatar aýdandarda da bar.
Mysaly, 20 mamyr kúni Syrym aýdanynda aýdandyq aýrýhana qyzmetkerinen koronavırýs tabylǵannan keıin onymen qarym-qatynasta bolǵan taǵy eki adamnyń aýrý juqtyrǵany belgili boldy.
«Naýqaspen baılanysta bolǵan aýdandyq aýrýhanadaǵy medıtsına qyzmetkerleri de oqshaýlanyp, tekserildi, olardan alynǵan test teris nátıje kórsetti. Naýqas turǵan úı
karantınge jabyldy. Aýrý juqtyrǵan taǵy eki adam anyqtalǵandyqtan, qazirgi kezde epıdemıologııalyq zertteý jumystary jalǵasýda, onyń qorytyndysy keıin habarlanatyn bolady», dedi N.Mustaev.
Óńirde barlyǵy 352 adam koronavırýs juqtyrsa, sonyń 261-i – BQO-nyń, 84-i – ózge óńirlerdiń turǵyndary. Jeteýi –sheteldik azamat.
Oblys boıynsha syrqattanǵandardyń 70,4 paıyzy – syrttan kelgender, sonyń ishinde 176-sy – Reseıden, 68-i – Atyraý oblysynan (67-si – Teńiz ken ornynan). Bir adam Germanııadan kelgen.
105 adam – buryn aýyrǵandarmen qarym-qatynasta bolǵandar. Sonyń ishinde 62-si densaýlyq saqtaý nysandarynda, 40-y úı oshaǵynda tirkeldi. Úsh adam – polıtsııa qyzmetkeri.
Kúni búgin 163 adam oblystyq juqpaly aýrýlar aýrýhanasynda em alýdy jalǵastyrsa, 7 adam provızorlyq, 140 adam karantındik statsıonarda jatyr. Úılerinde oqshaýlanǵan 1400 adam dárigerlerdiń baqylaýynda.
«20 mamyrdaǵy ósim kórsetkishi 3,8 paıyzdy qurap otyr. Eger aýrý kózderi kóbeıip ketken jaǵdaıda karantındik shekteý sharalary kúsheıtilýi múmkin. Sondyqtan turǵyndardan saqtyq sharalaryn umytpaýdy ótinemiz», dedi N.Mustaev.
Eske sala keteıik, budan buryn BQO-da Reseıden kelgenjambyldyq jumysshydan koronavırýs tabylǵanyn, 1,5 myńǵa jýyq medıtsına qyzmetkeri 192 mln teńge ústemeaqy alǵanyn jazǵan bolatynbyz.
