Koronavırýs bizdiń birligimizdi synǵa salýda - senator Aıgúl Qapbarova
«Álemde koronavırýs indetiniń taralýy azaımaı tur. Tipti kóptegen memleketterde qaıta órship ketti. Bul sózimizge Amerıka, Taıaý Shyǵys, Azııa, Avstralııa qurlyqtaryndaǵy jaǵdaılar dálel. Elimizde de ahýal kúrdelene túskeni jasyryn emes.Sol sebepti Qazaqstan Respýblıkasynyń Prezıdenti Qasym-Jomart Toqaevtyń televızııalyq úndeýi mańyzdy ári qajetti qadam boldy dep esepteımin», - dedi ol.
Senator koronavırýspen kúres memleket pen halyqtyń ózara áreketin, qoldaýyn, túsinistigin, bıznestiń áleýmettik jaýapkershiligin talap etip otyrǵandyǵyn basa aıtady.
«Bárimizge málim, elimizde koronavırýs faktileri tirkele bastaǵan tustan memleket tótenshe jaǵdaı rejımin engizip, der kezinde qajetti sharalardy qabyldaı bildi. Sonyń nátıjesinde indettiń taralýyn edáýir báseńdete aldyq. Keshe Prezıdent koronavırýspen aýyrǵandarǵa arnalǵan aýrýhana tósekteriniń 70 paıyzǵa deıin kóbeıtilip, 43 myńǵa jetkenin aıtty. Turǵyndarǵa úı jaǵdaıynda medıtsınalyq qyzmet kórsetý maqsatynda 400 ámbebap mobıldi brıgada jasaqtalǵanyn jetkizdi. Bul baǵyttaǵy jumystar, álbette, báseńdemeýi shart. Biz medıtsına júıesin uıymdastyrýda ketken qatelikterdi der kezinde túzetýge qabiletti bolýymyz kerek dep esepteımin. Prezıdent osyny eskertti», - dedi ol.
Sonymen qatar Aıgúl Qapbarova el azamattaryn emotsıonaldy jazbalar men deregi joq úreı týǵyzatyn aqparattarǵa senbeýge shaqyrdy.
«Óıtkeni úreıli aqparat kúızeliske ushyratyp, ımmýnıtetińizge keri áserin tıgizedi. Qazir bir-birimizden kiná izdeıtin kez emes. Álemniń birde-bir eli bul indetpen kúresýdiń ońaı jolyn tapqan joq. Ózińizdiń jáne jaqyndarynyń qaýipsizdigi men densaýlyǵyn saqtap, qarapaıym gıgıena, áleýmettik araqashyqtyq talaptaryn oryndaıyq. Azamattarymyz osy arqyly indetke qarsy kúrestegi jeńisti qamtamasyz etýge kómektesedi. Osy tusta bıznestiń áleýmettik jaýapkershiligin de arttyrý mańyzdy bolyp otyr. Sebebi sońǵy ýaqytta azamattarymyz dárihanalarda dárilerdiń joqtyǵyna, bar bolsa da olardyń baǵalarynyń sharyqtap ketkenine shaǵymdanýda. Buǵan qarsy kesh bolsa da qatań sharalar qolǵa alynýda. Koronavırýs bizdiń birligimizdi synǵa salýda. Bul indetti de az ýaqytta jeńetinimizge kámil senemin», - dedi Aıgúl Qapbarova.
Aıta keteıik, keshe QR Prezıdenti Qasym-Jomart Toqaev respýblıkalyq telearnalar arqyly elimizde qalyptasqan ahýalǵa baılanysty úndeý jasap, onda 13 shilde kúni Ulttyq aza tutý kúni dep jarııalanatyndyǵyn aıtqan edi.
