Koronavırýs bir syrqattan ortasha 3-4 adamǵa juǵady – SQO bas sanıtar dárigeri

PETROPAVL. QazAqparat – Soltústik Qazaqstan oblysynda koronavırýs ınfektsııasyn juqtyrý deńgeıi turaqtaldy, mamandar muny der kezinde qolǵa alynǵan is-sharalarmen baılanystyrady, dep habarlaıdy QazAqparat tilshisi.

SQO-nyń bas sanıtarııalyq dárigeri Arman Kúshbasovtyń pikirinshe, oblys ortalyǵyn karantınge jabý óz nátıjesin berip jatyr. Sońǵy kúndermen salystyrǵanda koronavırýs boıynsha jaǵdaı turaqtanyp qana qoımaı, 5,7% tómendetý múmkin bolǵan.

«Aýyrǵandardyń basym bóligi – Petropavldan. Osyǵan oraı 9 qarashadan bastap oblys ortalyǵy men oǵan shekaralas jatqan Qyzyljar aýdanyn blok-posttar qoıyp, karantınge japtyq. Senbi-jeksenbi jáne mereke kúnderine lokdaýn rejımi engizilgen. Budan basqa keı nysandardyń jumysyn shektedik. Bul – óz nátıjesin berdi. Osyǵan deıin oblystaǵy barlyq aýyrǵandardyń jartysynan astamy Petropavlda anyqtalsa, qazir ony 40% deıin tómendettik», - deıdi Arman Kúshbasov.

Mamannyń aıtýynsha, KVI-men aýyrǵan 1 adamnyń ózgelerdi juqtyrý deńgeıi 20% tómendegen.

«Koronavırýspen aýyrǵan bir syrqat ortasha 3-4 adamǵa juqtyrady. Qazan aıynda aýyrǵandarmen baılanysta bolyp, KVI anyqtalǵandardyń úlesi 13% qurasa, tek sońǵy aptada bul kórsetkish 50% qurady. Olarda negizinen aýrýdyń belgileri joq», - deıdi oblystyń bas sanıtarııalyq dárigeri.

Arman Kúshbasovtyń aıtýynsha, Petropavlda ázirge, karantındik shekteýler jeńildetilmeıdi. ıAǵnı senbi-jeksenbi jáne mereke kúnderi qoǵamdyq kólikter burynǵysynsha jumys istemeıdi.

Buǵan deıin oblystyń bas sanıtarııalyq dárigeri koronavırýs ınfektsııasyn negizinen kimderdiń jáne qaıda juqtyratynyn aıtqan edi.