Koronavırýs: Beıjińde 100 myń taksı júrgizýshisi vaktsına saldyrýǵa jazyldy

BEIJІŃ. QazAqparat – Qytaı astanasy Beıjińde taksı shaqyrýdyń «Didi Chuxing» atalatyn eń iri onlaın- platformasyn paıdalanatyn 100 myńnan astam júrgizýshi COVID-19-ǵa qarsy vaktsınany saldyrýǵa jazyldy, dep habarlaıdy «QazAqparat» HAA menshikti tilshisi.

«16 qańtardaǵy jaǵdaı boıynsha, Beıjińde 104 907 júrgizýshi COVID-19 vaktsınatsııasyna jazyldy, 46 787 adam vaktsınalaýdan ótti», – delingen «Didi Chuxing» kompanııasynyń habarlamasynda. Beıjiń bıligi koronavırýstyń taralýyn boldyrmaý sharalary aıasynda barlyq taksı júrgizýshilerin COVID-19 testileýinen ótýge jáne koronavırýsqa qarsy vaktsına saldyrýdy mindettedi.

Taksı qyzmetin paıdalanatyn astanalyq jolaýshylar taksıge otyrar aldynda densaýlyq kodtaryn skanerlep, qala boıynsha óz qozǵalystaryn tirkeýi tıis. Beıjiń bıligi sanıtarlyq-epıdemıologııalyq erejelerdi buzǵany úshin birqatar taksı qyzmetine 200 myń dollardan astam aıyppul saldy.