Koronavırýs: Batys Qazaqstanda ınfektsııalyq statsıonarlar sany 13-ke jetti

ORAL. QazAqparat – Batys Qazaqstan oblysynda sońǵy aptada koronavırýstyń órshýine baılanysty ınfektsııalyq tósek-oryn 619-dan 751-ge deıin ulǵaıtylyp, statsıonar sany 13-ke jetti, dep habarlaıdy QazAqparat tilshisi.

BQO densaýlyq saqtaý basqarmasy basshysynyń orynbasary Ashat Balyqovtyń óńirlik kommýnıkatsııalar qyzmeti alańynda ótken brıfıngide málim etkenindeı, Báıterek aýdandyq aýrýhanasynda 30 tósektik, oblystyq perınataldyq ortalyqta KVI juqtyrǵan bosanatyn áıelder úshin 20 tósektik jáne oblystyq juqpaly aýrýlar aýrýhanasynda balalarǵa arnalǵan 80 tósektik bólimshe jańadan ashyldy.

Onyń aıtýynsha, qazirgi kezde ınfektsııalyq statsıonarlarda 310 naýqas em alyp jatyr, aýrýhanalar 41,3 paıyzǵa tolǵan.

Sonyń ishinde 76 tósektik jansaqtaý bólimshesinde 18 naýqas (23,7 paıyz) aýyr halde.

«Pandemııa bastalǵannan beri koronavırýs juqtyrǵan 45 792 adamnyń 39 889 jazylyp shyqty. Sonyń 15 572-si statsıonarlyq, 24 317-si ambýlatorlyq em aldy. Іndet bastalǵannan beri 859 naýqas kóz jumdy. Oblysta jaǵdaı turaqsyz bolyp otyr. Kún saıyn indet juqtyrǵandar sany óse túsýde», dedi A.Balyqov.

Eske sala keteıik, budan buryn BQO-da 5 myńnan asa adamnyń ambýlatorlyq em alyp jatyrǵanyn, sondaı-aq 431 oqýshy, 178 muǵalimnen koronavırýs anyqtalǵanyn jazǵan bolatynbyz.