Koronavırýs: Batys Qazaqstanda 1400-ge jýyq adam úıde oqshaýlanýda
ORAL. QazAqparat – Batys Qazaqstan oblysynda koronavırýs juqtyrǵandar sany 103-ke jetti, dep habarlaıdy QazAqparat tilshisi.
BQO taýarlar men kórsetiletin qyzmetterdiń sapasy men qaýipsizdigin baqylaý departamenti basshysynyń orynbasary Nurlybek Mustaevtyń brıfıngte málim etkenindeı, sonyń basym kópshiligi – Reseıden kelgender.
101 adam oblystyq juqpaly aýrýlar aýrýhanasynda em alyp jatsa, ekeýi jazylyp shyqty.
«Kúni búgin oblysta 24 adam provızorlyq, 110 adam karantındik statsıonarda jatyr. Oǵan qosa 1386 adam úıde oqshaýlanǵan, olar da kúndelikti medıtsınalyq baqylaýǵa alynǵan», dedi N.Mustaev.
Sonymen qatar N.Mustaev karantındik shekteý sharalarynyń jalǵasatynyn jetkizdi. Atap aıtqanda, BQO bas memlekettik sanıtarynyń qaýlysyna engizilgen ózgeristerge sáıkes budan buryn Oralda qoǵamdyq kólikter qozǵalysy toqtatylǵan edi. Bul shara endi 28 sáýirge deıin uzartylady.
Sol sekildi sanıtarlyq-epıdemıologııalyq talaptardy saqtap, qyzmet atqaratyn kóterme saýda oryndarynan basqa óńirdegi azyq-túlik bazarlary da 28 sáýirge deıin jabyq turady. Bankter boıynsha da jaǵdaı osyndaı. Tek zeınetaqy, járdemaqy, ataýly áleýmettik kómek beretin bankter ǵana saǵat 09.00-den 16.00-ge deıin qyzmet kórsetedi.
Eske sala keteıik, budan buryn BQO-da sońǵy tirkelgen 6 naýqastyń beseýi Reseıden kelgenin, oblysta 133 myń turǵynǵa 42500 teńgeden berilgenin jazǵan bolatynbyz.
