Koronavırýs: Batys Qazaqstan oblysynda ahýal qandaı
ORAL. QazAqparat – Batys Qazaqstan oblysynda osy kezge deıin 6767 adamnyń koronavırýs juqtyrǵany tirkelse, sonyń 6175-i jazylyp shyqty, dep habarlaıdy QazAqparat tilshisi.
BQO Densaýlyq saqtaý basqarmasynyń baspasóz qyzmetinen málim etkenindeı, sonyń ishinde 2933 adam statsıonardan úılerine jiberilse, 3242 adam ambýlatorlyq em aldy.
Ókinishke qaraı, 97 adam kóz jumdy.
Pnevmonııaǵa shaldyqqan 82 adamnyń 16-sy juqpaly aýrýlar aýrýhanasynda, 16-sy provızorlyq statsıonarda, 50-i ambýlatorlyq em alýda. Pnevmonııadan 206 adam qaıtty.
Kúni búgin jasandy tynys alý apparatyna qosylǵan naýqas joq. Al ottegi kontsentratorymen 4 emdelýshi tynys alýda.
Qazirgi tańda juqpaly aýrýlar aýrýhanasynda 52, provızorlyq statsıonarda 18 adam emdelýde. Aýyr haldegi 3 syrqat jansaqtaý bóliminde.
Vırýsqa qarsy, sondaı-aq qyzý túsiretin dári-dármek eki aıǵa jetedi dep eseptelýde. Kúni búgin medıtsına mekemelerinde dári-dármek tapshylyǵy joq. Sol sekildi jeke qorǵanys quraldary da jetkilikti.
Statsıonarlarǵa jumysqa 111 medıtsına qyzmetkeri tartylsa, sonyń 19-y – dárigerler.
QR Densaýlyq saqtaý mınıstrligi komıssııasynyń sheshimimen Batys Qazaqstan oblysyna 118 dáriger joldama aldy. Qazirgi kezde óńirge 67 jas maman kelip, jumysqa kiristi. Oǵan qosa S.Asfendııarov atyndaǵy ulttyq medıtsına ýnıversıtetinen 3 endıkrınolog pen 1 ınfektsıonıst kelmekshi.
Batys Qazaqstan joǵary medıtsınalyq kolledjin bitirgen 307 mamannyń 104-i qalalyq jáne aýdandyq medıtsına mekemelerine ornalasty.
Sońǵy kezde oblysta koronavırýspen aýyrǵandar sany (3 qyrkúıek kúni 2 adam tirkeldi) azaıǵanymen, turǵyndarǵa saqtyq sharalaryn umytýǵa bolmaıdy.
Eske sala keteıik, budan buryn Oralda jańadan juqpaly aýrýlar aýrýhanasy boı kóteretinin jazǵan bolatynbyz.
