Koronavırýs: Aýrýhanaǵa túsken naýqastardyń synamasy úsh kúnde anyqtalady

NUR-SULTAN. QazAqparat - Qytaıdaǵy koronavırýsqa baılanysty aýrýhanaǵa túsken naýqastardyń synama nátıjeleri úsh kúnde anyqtalady. Bul týraly Qazaqstannyń bas sanıtarlyq dárigeri Jandarbek Bekshın aıtty, dep habarlaıdy QazAqparat tilshisi.

«Bzdiń mamandarymyz tumaýdy, sýyq tııýdi, JRVI-di boldyrmaý, koronavırýsty anyqtaý úshin naýqastan synama ala alady. Qazirgi ýaqytta elimizdiń 2 jerinde, Almaty men Nur-Sultanda bıotehnologııa ǵalymdarymen birlesip, otandyq dıagnostıka qoıý ádisterin ázirleýdemiz. Aýrýhanaǵa túsip jatqan naýqastardyń synamalaryn ózimizdiń zerthanalarǵa jiberemiz. Ol úsh kúnde anyqtalady. Qıynshylyq týsa, onda bizdiń algorıtmge sáıkes, Dúnıejúzilik densaýlyq saqtaý uıymy bekitken zerthanaǵa synamalardy jiberemiz», - dedi bas sanıtarlyq dáriger.

Buǵan qosa, onyń aıtýynsha, elimizdiń Densaýlyq saqtaý mınıstrligi Reseıdegi áriptesterimen qajet bolǵan jaǵdaıda synamalardy Máskeý men Novosibir qalalaryndaǵy zerthanalarǵa jiberýge kelisken. Jalpy, bas sanıtarlyq dáriger qańtardyń 30-yna deıin otandyq dıagnostıkalaý ádisi daıyndalatyndyǵyn atap ótti.

«Qytaıdan kelgen azamattarymyz jáne sheteldikterdiń bári esepke alyndy. Sebebi osy kelgen otandastarymyzdan jáne sheteldikterden JRVI, tumaý belgilerin anyqtaý, ony tolyq zerttep, dıagnoz qoıýmyz kerek. Mundaı aýrý shyqsa, onda ony tez arada anyqtap, oqshaýlaýymyz qajet. Sonda qoǵamymyzdy qorǵaımyz», - dedi Jandarbek Bekshın.

foto: naked-science.ru