Koronavırýs: Aýrý belgileri baıqalsa, emhanaǵa barmaı, jedel járdemge habarlasqan jón
«Bul statsıonar qalanyń syrtynda, bólek ǵımaratta ashylǵan. Sondyqtan, ózge nozologııalyq formadaǵy naýqastar bólek statsıonarda qaralady. Medqyzmetkerler qaýipsizdik sharalaryn saqtaý boıynsha arnaıy oqytýdan ótken», - dedi basqarma basshysy Ortalyq kommýnıkatsııalar qyzmetinde ótken baspasóz máslıhatynda.
Onyń aıtýynsha, aýrýdyń basty belgileri - joǵary temperatýra men jótel baıqalsa, úıde otyrǵan jón.
«Mundaı belgilermen medıtsınalyq mekemelerge barmaýlaryńyzdy suraımyz. Onyń ornyna koll-ortalyqqa nemese jedel járdem qyzmetine habarlasyp, keńes alyńyz. Koreıada jańa ınfektsııany juqtyrǵan naýqastar emhanaǵa kelip, tutas klınıkalardy qyzmetkerlerimen, kezek kútken adamdarmen birge karantınge japqan oqıǵalar boldy. Bul tájirıbe bizdiń de medıtsınalyq uıymdarda qoldanylady. Sondyqtan, bizdiń keńesterdi qatań ustanýdy suraımyz», - dedi S. Qısyqova.
Buǵan deıin QR Densaýlyq saqtaý mınıstri Eljan Birtanov elordada koronavırýs juqtyrǵan úshinshi adamnyń anyqtalǵanyn habarlady. Qazaqstandyq áıel 12 naýryz kúni Mılan-Máskeý-Nur-Sultan reısinen túsirilip, Nur-Sultan qalasyndaǵy kópbeıindi medıtsınalyq ortalyqtyń karantındik statsıonaryna jatqyzylǵan.
Sondaı-aq, naýqaspen bir ushaqta bolǵan 20 jolaýshy aýrýhanaǵa jatqyzyldy.