Koronavırýs: Atyraýǵa Mysyrdan ushyp kelgen 34 adamnyń PTR-test qorytyndysy shyqty
ATYRAÝ. QazAqparat –Atyraý oblysyna Mysyrdan PTR-anyqtamasyz ushyp kelgen 34 jolaýshydan koronavırýs tabylmady, dep habarlaıdy QazAqparat.
Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, 21 jeltoqsanda Atyraýǵa Mysyrdyń Sharm-el-sheıh qalasynan 150 jolaýshy ushyp kelgen. Onyń ishinde 34 jolaýshyda PTR-test nátıjesi bar anyqtama bolmaǵan.
«Mysyrdan ushyp kelgen barlyq jolaýshydan koronavırýsqa qarsy synama alyndy. Zertteý qorytyndysy teris nátıje kórsetip, jolaýshylardan qaýipti ınfektsııa anyqtalmady. Qazir olar úıine jiberildi», - dep habarlady basqarmanyń basqpasóz qyzmetinen.
Buǵan deıin Atyraýǵa 14-21 jeltoqsan aralyǵynda «Amsterdam-Atyraý» baǵytymen barlyǵy 143 jolaýshy ushyp kelgen. Onyń ishinde 2 jolaýshyda COVID-19-ǵa PTR-test qorytyndysy bolmaı shyqqan. Sol sebepten, karantındik statsıonarǵa jatqyzyldy. Olardan da COVID-19 ınfektsııasy anyqtalǵan joq.
Eske salaıyq, buǵan deıin Teńiz kenishinde taǵy 30 jumysshy koronavırýs juqtyrǵanyn habarlaǵan edik.
