Koronavırýs: Atyraýdaǵy kardıologııa ortalyǵynda ınfektsııalyq statsıonar quryldy

ATYRAÝ. QazAqparat – Atyraýda kardıologııalyq ortalyqta 100 tósektik ınfektsııa statsıonary ashyldy, dep habarlaıdy QazAqparat.

Atyraý oblystyq densaýlyq saqtaý basqarmasynyń baspasóz qyzmetinen málim etkendeı, atalǵan ortalyqta júrek-qan tamyr aýrýy bar naýqastardy qabyldaý jalǵasa beredi.

«Kardıologııalyq ortalyqta júrek-qan tamyrlary syrqatyna shaldyqqan patsıentterdi shuǵyl qabyldaý úshin 50 tósek-oryn bar. Qazir mundaı patsıentterdi josparly emdeý úshin kardıologııalyq ortalyqqa jatqyzý toqtatyldy. Olar ýaqytsha emhanalardaǵy ýchaskelik dárigerlerdiń baqylaýynda bolady», - dep habarlady basqarmanyń baspasóz qyzmeti.

Belgili bolǵandaı, búgin kardıologııa ortalyǵyndaǵy ınfektsııa statsıonaryna koronavırýs ınfektsııasyn juqtyrǵan 6 naýqas jatqyzylǵan.

Óńirde ótken táýlikte qaýipti vırýsqa shaldyqqan 154 naýqas anyqtalǵan.

«Qazir modýldik ınfektsııalyq aýrýhanada 192, №2 oblystyq aýrýhanada 142, ftızıopýlmanologııa ortalyǵynda 50 naýqas emdelip jatyr. Jylyoı aýdanynda ornalasqan Teńiz ken ornyndaǵy ınfektsııalyq statsıonarda - 52, aýdandardaǵy statsıonarlarda - 132 patsıent emdelýde. Sondaı-aq, úı jaǵdaıynda emdelý úshin 608 adam oqshaýlandy», -dep málim etti baspasóz qyzmetinen.

Eske sala ketelik, budan buryn Atyraýdyń 7 aýdany men Teńiz kenishinde koronavırýsqa shaldyqqandar anyqtalǵanyn habarlaǵan edik.