Koronavırýs: Atyraýda muǵalimder dárigerlerge arnap sýret saldy
«Bizdiń vırtýaldy qoldaý kórsetýimizge 13 jastaǵy Raıda esimdi oqýshynyń Densaýlyq saqtaý mınıstri Eljan Birtanovqa jazǵan haty sebep boldy. Óziniń birinshi múshel jasyna tolǵan týǵan kúninde janynda anasynyń bolmaǵanyna qynjyldy. Óıtkeni, dáriger bolyp jumys isteıtin anasy koronavırýspen aýyrǵandardy emdeýde.
Oqýshy qyz mınıstrden adamdardyń aýyrmaýy úshin, anasynyń tezirek úıine oralýy úshin bar múmkindikti jasaýdy ótindi. Bul bizge de oı saldy. Akademııa qabyrǵasyna medıtsınalyq maska men qolǵap kıgen dárigerdiń sýretin saldyq. Osylaısha, koronavırýs oshaǵynda óz ómirin táýekelge tigip, syrqattardy kúni-túni emdep jatqan qazaqstandyq dárigerlerdi qoldaǵymyz keldi. Biz olardyń laıyqty eńbegine qurmetimizdi osylaı bildirdik» -dedi N.Tilendıev atyndaǵy kishi óner akademııasy sýret pániniń muǵalimi Meıirbek Baqtııar.
