Koronavırýs: Atyraýda 98 naýqas jansaqtaý bóliminde jatyr
Oblystyq densaýlyq saqtaý basqarmasy baspasóz qyzmetiniń aqparatyna qaraǵanda, ótken táýlikte 310 adam qaýipti vırýsty juqtyrǵan. Atyraý qalasynda 187, al Jylyoı aýdanyndaǵy Teńiz ken ornynda 60 naýqas tirkelgen. Ózge naýqastar 6 aýdanda anyqtalǵan.
«Qazir úı jaǵdaıynda emdelý úshin 8 614 adam em qabyldaýda. Óńirdegi 3 012 oryndyq
ınfektsııalyq statsıonarlarda 1 674 naýqas emdelip jatyr. Statsıonarlardaǵy júkteme
55,6%-dy qurady. Al, statsıonarlardyń 114 tósek-orny bar jansaqtaý bóliminde jaǵdaıy
aýyr 98 naýqas oqshaýlandy. Onyń ishinde 11 patsıent ókpeni jasandy jeldetý apparatyna qosylǵan. Bul bólimdegi júkteme 86,8%-ǵa jetti», -dep málim etti basqarmanyń baspasóz qyzmetinen.
Sondaı-aq, 21-22 tamyzda 2 553 atyraýlyq koronavırýs ınfektsııasyna qarsy vaktsınalardyń I komponentin saldyrǵan. Osylaısha, bıylǵy 1 aqpannan beri 178 462 adam vaktsınalardyń I komponentin ektirgen. Vaktsınalardyń II komponentin saldyrǵandardyń sany 128 644 adamdy qurap otyr.
Eske sala ketelik, buǵan deıin Atyraýda bir aptada Vero Cell vaktsınasyn 1,7 myń adam
saldyrǵany habarlanǵan bolatyn.