Koronavırýs: Atyraýda 33 naýqas jansaqtaý bóliminde jatyr
Oblystyq densaýlyq saqtaý basqarmasy baspasóz qyzmetiniń málimetinshe, koronavırýs ınfektsııasyna shaldyqqan naýqastardy emdeý úshin 2 068 tósek-orny bar 11 ınfektsııalyq statsıonar, 81 reanımatsııalyq tósek daıyndalǵan. Atyraý qalasynda 430 tósek-orynǵa arnalǵan 3 statsıonar, Teńiz ken ornynda 1 360 tósektik statsıonar, al 7 aýdanda 278 tósektik ınfektsııalyq statsıonarlar jumys isteıdi.
«Sońǵy málimetke sáıkes, ınfektsııalyq statsıonarlarda qaýipti indetke shaldyqqan 606 adam em qabyldaý úshin oqshaýlandy. Onyń ishinde modýldik aýrýhanada – 179, Teńiz ken ornyndaǵy ınfektsııalyq statsıonarda – 150, aýdandardaǵy statsıonarlarda – 131, oblystyq aýrýhananyń statsıonarynda – 106, ftızıopýlmonologııa ortalyǵyndaǵy statsıonarda 40 naýqas emdelip jatyr. Al, úı jaǵdaıynda 1111 adam em alýda» -dep habarlady basqarmanyń baspasóz qyzmetinen.
Sondaı-aq, jansaqtaý bóliminde 33 naýqas jatyr. Onyń 5-eýi burynǵysha ókpeni jasandy jeldetý apparatyna qosylǵan.
Eske sala ketelik, budan buryn Atyraýda koronavırýs juqtyrǵan naýqastardyń kóbeıýine baılanysty rezervtik statsıonarlar ashylǵanyn jazǵan edik.
