Koronavırýs: Atyraý oblysynda naýqastardyń 70% – Teńiz kenishiniń jumysshylary
ATYRAÝ. QazAqparat –Atyraý oblysynda koronavırýs juqtyrǵandardyń basym bóligin Teńiz kenishiniń jumysshylary quraıdy, dep habarlaıdy QazAqparat.
Atyraý qalalyq Canıtarııalyq-epıdemıologııalyq baqylaý basqarmasy epıdemıologııa bóliminiń basshysy Ásel Muqaevanyń aıtýynsha, sońǵy táýlikterde qaýipti indetke shaldyqqandardyń deni Teńiz keni jumysshylarynyń arasynan anyqtalǵan.
«Olar koronavırýs juqtyrǵandardyń 70 paıyzyn quraıdy. Jumysshylardyń basym bóliginde qaýipti indet aldyn ala tapsyrylatyn mindetti skrınıngilik tekseris kezinde belgili bolǵan. QR Bas memlekettik sanıtarııalyq dárigeriniń №57 qaýlysyna sáıkes, koronavırýs anyqtalǵan naýqaspen 3 jáne 12 táýlikte jaqyn qarym-qatynasta bolǵan adamdardan PTR-synama alynady. Keıin olar 14 kúnge úı karantınine oqshaýlandyrylady», - dedi Ásel Muqaeva.
Basqarma ókili karantınge oqshaýlanǵan adamda aýrý sımptomy baıqalsa, dereý dárigerge júginýge keńes beredi. Naýqastyń jaǵdaıy aýyr bolsa ınfektsııalyq statsıonarǵa jatqyzylady.
Eske sala ketelik, budan buryn Teńiz kenishinde statsıonardaǵy naýqastar sany 400-ge jetkenin jazǵan edik.
