Koronavırýs: Armenııanyń bilim berý mekemelerinde sabaq berile bastady
EREVAN. QazAqparat – Sońǵy málimetter boıynsha, Armenııada koronavırýsty anyqtaýǵa baǵyttalǵan jalpy 211 zerthanalyq synama júrgizilip, sonyń bireýi ǵana oń nátıje kórsetti. Dúısenbiden bastap oqý mekemelerinde sabaq bastalady. Bul týraly QazAqparat tilshisi habarlaıdy.
Dúısenbi kúni koronavırýs taralýynyń aldyn alý jónindegi vedomstvoaralyq komıssııanyń otyrysynda Armenııanyń Densaýlyq saqtaý mınıstri elde indet juqtyrýdyń jańa oqıǵalary tirkelmegenin málim etti.
«Osy ýaqytqa deıin Armenııada jalpy 211 zerthanalyq synama júrgizilip, sonyń bireýinen ǵana koronavırýs anyqtalǵan», - dedi eldiń Densaýlyq saqtaý mınıstri Arsen Torosıan.
Armenııa úkimetiniń sheshimi boıynsha, 9 naýryzdan bastap búkil respýblıkadaǵy bilim berý mekemelerinde oqý protsesi qalpyna keltirildi. Buǵan deıin Armenııa úkimeti koronavırýstyń elde alǵashqy tirkelgen oqıǵaǵa baılanysty oqý protsesin ýaqytsha toqtatyp, kóktemgi demalysty josparlanǵan merzimnen bir apta erte aýystyrý sheshimin qabyldady.
«Biz úrdisterdi muqııat baqylap, Densaýlyq saqtaý mınıstrimen birge epıdemıologııalyq jaǵdaıdy qadaǵaladyq, JRVI-ǵa shaldyqqan azamattar sanynyń qysqarǵanyn belgiledik. Oqý mekemelerinde sabaq toqtatýǵa sebep joq», - dep jazdy Facebook-tegi paraqshasynda Bilim mınıstri Araık Arýtıýnıan.
Sonymen birge, úkimet sheshimi boıynsha, Armenııa men Iran arasyndaǵy vızasyz rejım týraly memorandýmnyń kúshi ýaqytsha toqtatylyp, Iranmen kommýnıkatsııalarǵa ýaqytsha shekteý qoıý merzimin uzartty.
Eske sala keteıik, 1 naýryzǵa qaraǵan túni Armenııada koronavırýs juqtyrýdyń alǵashqy jaǵdaıy anyqtaldy. Bir kún buryn Irannan kelgen Armenııa azamatynyń testi oń nátıje kórsetti.
Foto: www.panorama.am
