Koronavırýs: Armenııada erteńnen bastap birqatar shekteýler alynady
Armenııa ekonomıka mınıstriniń orynbasary Varos Sımonıan tótenshe jaǵdaı rejımi aıasynda engizilgen shekteýlerdi alyp tastaıtyn úkimet sharalaryn tanystyrdy. 4 mamyrdan bastar azamattardyń respýblıka boıynsha júrip-turýyna bolady. Degenmen qoǵamdyq kólik qozǵalysy, oblysaralyq tasymal toqtaǵan kúıi tura beredi. 4 mamyrdan bastap kóterme jáne bólshek saýdaǵa ruqsat etiledi. Tek iri saýda ortalyqtary jabyq turady. Hımtazalaý, shashtaraz, sulýlyq salondary jumysyn bastaıdy.
Mınıstr orynbasarynyń aıtýynsha, 4 mamyrda qaıta óńdeý ónerkásibi salasyndaǵy jumys qaıta jandanady. Jazǵy terrasasy bar restoran, dámhana, barlar jumys isteıdi. Degenmen jabyq ǵımarattaǵy qoǵamdyq tamaqtaný oryndarynda qyzmet kórsetýge tyıym salynǵan. Sonymen qatar, botanıkalyq, zoologııalyq baqtar, qoryqtar men basqa da tabıǵı aýmaqtar ashylady.
Sımonıannyń sózine sensek, 4 mamyrda jumysyn bastaıtyn ekonomıkalyq sýbektilerdiń jumysy arnaıy ereje jáne nusqaýlarǵa negizdeledi. Al ol talaptardyń qatań saqtalýyn ınspektsıyıalyq organdar men jaýapty vedomstavolar qadaǵalaıdy.
Eske sala keteıik, Armenııada 16 naýryz ben 14 mamyr aralyǵyna tótenshe jaǵdaı rejımi engizilgen. Densaýlyq saqtaý mınıstrliginiń málimetinshe, 2 mamyrǵa deıin elde 2273 adam koronavırýs juqtyrǵan. Onyń ishinde 1010 adam aýrýdan jazylyp ketse, 33 naýqas kóz jumǵan.
