Koronavırýs: Almaz Sharman vaktsınatsııanyń tıimdiligin aıtty
ALMATY. QazAqparat - Qazaqstannyń Profılaktıkalyq medıtsına akademııasynyń prezıdenti Almaz Sharman COVID-19-ǵa qarsy vaktsınatsııanyń tıimdiligi týraly aıtty, dep habarlaıdy QazAqparat tilshisi.
Almaz Sharmannyń aıtýynsha, álemdik sarapshylar pandemııanyń 2021 jyldyń ortasynda nemese sońynda aıaqtalatynyn boljap otyr.
Bul tıimdi jáne qaýipsiz vaktsınalardyń daındalýymen baılanysty. Qazir álemde mundaı vaktsınalardy jasaý úshin 200-ge jýyq zerthana jumys istep jatyr.
«Koronavırýsqa qarsy Pfizer/BioTech jáne Moderna kompanııasynyń vaktsınasy jaqynda synaqtan sátti ótti. Olardyń tıimdiligi 95 paıyzdan asqan. Bul óte joǵary kórsetkish. Eki vaktsına matrıtsalyq RNQ-nyń eń zamanaýı tehnologııasyna negizdelgen. Onyń basty ereksheligi tek antıdenelerdiń bólinýine ǵana emes ári jasýshalyq ımmýndyq áserine de yqpal etedi. Bul nátıjelerdiń barlyǵy medıtsına mamandarynyń boljamynan asyp tústi. Demek, ǵalymdar COVID-19-dy jeńý jolynda taǵy bir mańyzdy qadam jasaǵan syndy», - dedi ol.
Keler jyly birneshe mıllıard dozada túrli vaktsınalar óndiriledi dep kútilýde. Bul rette, álemde halyqty vaktsınatsııalaý máselesi túrli pikirler týdyrýda.
Professordyń sózinshe, vaktsınalar adamzatqa pandemııadan qorǵaıtyn ımmýnologııalyq kópshikti qalyptastyrýǵa kómektesedi. Alaıda, aǵzada koronavırýsqa qarsy beıtarap antıdenelerdiń qanshalyqty uzaq saqtalatyny jáne adamnyń qansha ýaqytqa ımmýnıtetke ıe bolatyny áli de belgisiz.
Eske salsaq, Qazaqstanda otandyq QazCovid-in vaktsınasyn klınıkalyq zertteýdiń qorytyndy III kezeńiniń bastalýy maquldandy. Aldyn ala zertteý nátıjeleri vaktsınanyń joǵary qaýipsizdigi, ımmýnogendiligi jáne tıimdilik deńgeıiniń 96% kórsetip jatyr.
Koronavırýstan qazaqstandyq vaktsınany jasaýshy ǵalym, professor Lespek Kútimbetov vaktsına ázirliktiń qandaı fazasynda ekenin aıtty.
Onyń aıtýynsha, QR BǴM Ǵylym komıteti Bıologııalyq qaýipsizdik problemalarynyń ǵylymı-zertteý ınstıtýty 5 vaktsına daıyndap jatyr.
Onyń ishinde «QazCovid-in» dep atalatyn bireýi erikti adamdarǵa synalyp úlgergen. Qazir synaqtyń 2 fazasynan da ótti. «Birinshi fazasynda 18 ben 50 jas aralyǵyndaǵy 44 adamǵa egildi. Ekinshi fazasy 30 qarashada aıaqtaldy. Ony 50 jastan asqan 200 adamǵa salyp kórdik. Klınıkalyq zertteýler oń nátıje kórsetip otyr. Vaktsına ımmýnogendik belsendilik týdyrady. COVID-19-dan qorǵaıdy», - dedi professor. Tipti shilde aıynda vaktsınany oılap tabýǵa atsalysqan birneshe ǵalym ony óz aǵzalaryna synap kórgen. Lespek Kútimbetov qazaqstandyq vaktsına ımmýnogendik qasıeti boıynsha reseılik «Spýtnık V»-dan kúshtirek bolatynyn jetkizdi.
