Koronavırýs: Almatynyń Telemedıtsına ortalyǵynyń júktemesi tórt esege artty
Almaty Telemedıtsına ortalyǵynyń dárigerleri kún saıyn megapolıs turǵyndarynan 5 myńǵa jýyq qońyraý qabyldaıdy jáne emdelip jatqan almatylyqtardyń nómirine 57 myńǵa jýyq shyǵys qońyraý jasaıdy.
Juldyz Baýyrjanqyzynyń aıtýynsha, olar táýlik boıy jumys isteıdi jáne patsıenttermen beıne jáne aýdıo baılanys arqyly baılanysady.
«Almatynyń Telemedıtsına ortalyǵy ótken jyldyń qyrkúıeginde Ortalyq qalalyq klınıkalyq aýrýhanasynyń bazasynda quryldy. Búginde dárigerler orta eseppen kún saıyn bes myńǵa jýyq qashyqtan konsýltatsııa júrgizedi,táýligine eki ret – tańerteń jáne keshke habarlasamyz. Eger syrqattanǵan adamda sımptomdar anyqtalsa, mamandar ony tekseredi nemese aýrýhanaǵa jatqyzý týraly sheshim qabyldaıdy. Telemedıtsına eki negizgi mindetti sheshýge múmkindik berdi: naýqastyń jaǵdaıy únemi baqylanady, sonymen qatar densaýlyq saqtaý júıesine shamadan tys júktemeni túsirmeıdi», - dedi Juldyz Baýyrjanqyzy.
Onyń aıtýynsha, qajetti tekserý júrgizgennen keıin jedel járdem dárigerleri nemese emhanalar naýqasty jatqyzý nemese úıde emdeý týraly sheshim qabyldaıdy.
Eger naýqas COVID-19-ben syrqattansa, onda telemedıtsına ortalyǵy men emhana dárigeriniń baqylaýynda bolady. Eger densaýlyǵy nasharlasa, dáriger naýqasty úıde jeke tekseredi nemese jedel medıtsınalyq kómek kórsetiledi. Sonymen qatar, ortalyq dárigerleri ekpe alǵan qalalyqtardyń densaýlyǵyn baqylaıdy.
Sonymen qatar, ol Almatydaǵy Telemedıtsına ortalyǵynyń telefon nómirlerin eske saldy: uıaly telefonnan 1312 jáne qalalyq nómirlerden 300-05-05 habarlasýǵa bolady.
Eske salsaq, búginde Almatyda Telemedıtsına ortalyǵy mamandarynyń baqylaýynda 13 134 naýqas bar, olardyń 41-i statsıonardan keıingiler. Barlyǵy 78 469 KVI indeti jańa anyqtalǵan naýqastar baqylaýǵa alyndy, onyń ishinde 3 348-i statsıonardan shyqqandar.
Kúnine 4 720-dan astam shyǵys jáne kiris qońyraýlar óńdeledi, qazirgi ýaqytta ortalyq 81 375 kiris jáne 609 920 shyǵys qońyraýlarǵa qyzmet kórsetti.
Juldyz Baýyrjanqyzy Almatynyń Telemedıtsına ortalyǵynyń júktemesi ótken aımen salystyrǵanda 3-4 esege artqanyn aıtty.
Eger maýsym aıynda shamamen 3 021 kiris jáne 53 196 shyǵys qońyraý tirkelse, al 1-16 tamyz aralyǵynda 14 262 kiris, 56 733 shyǵys qońyraý tirkeldi.
Spıker konsýltatsııalardy túrli profıldegi dárigerler júrgizetinin jetkizdi.
Olardyń ishinde: jalpy tájirıbe dárigeri, ınfektsıonıst, terapevtter, kardıologtar, gınekologtar, reanımatologtar jáne basqalary bar. Qazirgi ýaqytta Telemedıtsına ortalyǵynda 76 qyzmetker aýysymmen jumys istep jatyr.