Koronavırýs: Almatynyń medıtsına qyzmetkerlerine 15,1 mlrd teńge ústeme aqy tólendi
ALMATY. QazAqparat - 2020 jyldyń naýryzynan qarashaǵa deıingi KVI-ge qarsy kúreske qatysqan Almatynyń 8 myń medıtsınalyq qyzmetkeri turaqty jalaqylaryna qosymsha ústeme aqy aldy, dep habarlaıdy QazAqparat tilshisi.
Koronavırýs pandemııasy bastalǵaly Almatynyń Qoǵamdyq densaýlyq basqarmasyna qarasty medıtsına uıymdarynyń 8 myńǵa jýyq qyzmetkerine 15 142 760,1 myń teńge kóleminde ústeme aqy tólendi.
Ústeme aqynyń mólsheri dárigerlerdiń qandaı aımaqta jumys jasaǵanyna baılanysty boldy. QR Densaýlyq saqtaý mınıstrliginiń buıryǵyna sáıkes, tólemderdi berý 3 táýekel toptary boıynsha júzege asyryldy.
Birinshi táýekel tobyna (óte joǵary) - juqpaly aýrýlar statsıonarlarynyń dárigerleri, orta jáne kishi medıtsına qyzmetkerleri, COVID-19 naýqastaryna medıtsınalyq kómek kórsetýge qatysqan jansaqtaý bólimderiniń jáne basqa da statsıonarlar qyzmetkerleri jatqyzyldy.
Osy táýekel tobyndaǵy bir qyzmetkerge beriletin ústeme aqy kólemi eń tómengi aılyqtyń jıyrma eselengen mólsherinen asqan joq. Osy toptaǵylarǵa jalpy somasy 6 795 746,1 myń teńge tólendi.
Ekinshi táýekel tobyna (joǵary) – provızorlyq statsıonarlardyń, provızorlyq bólimderdiń dárigerleri, orta jáne kishi medıtsına qyzmetkerleri, jedel medıtsınalyq kómektiń dárigerleri men feldsherleri, onyń ishinde ambýlatorııalyq jaǵdaıda medıtsınalyq kómek kórsetetin densaýlyq saqtaý uıymdarynyń qyzmetkerleri endi.
Bul táýekel tobyndaǵy bir qyzmetkerge beriletin ústeme aqy kólemi eń tómengi jalaqynyń on eselengen mólsherinen aspady. Atalǵan topqa tólengen ústeme aqynyń jalpy somasy – 6 223 334,0 myń teńge.
Úshinshi táýekel tobynda (ortasha) - karantındik statsıonarlardyń dárigerleri, orta jáne kishi medıtsına qyzmetkerleri, jedel medıtsınalyq kómek brıgadasynyń júrgizýshileri, onyń ishinde ambýlatorııalyq jaǵdaıda medıtsınalyq kómek kórsetetin densaýlyq saqtaý uıymdarynyń qyzmetkerleri boldy.
Onda bir qyzmetkerge beriletin ústem aqy mólsheri eń tómengi jalaqynyń bes eselengen mólsherinen aspady. Osy toptaǵylarǵa jalpy somasy 2 123 680,0 myń teńge kóleminde ústem aqy tólendi.
