Koronavırýs: Almatyǵa qańtardyń sońyna deıin 1,4 myń vaktsına jetkiziledi
ALMATY. QazAqparat - Almaty qalalyq Qoǵamdyq densaýlyq basqarmasynyń basshysy Narıman Tabynbaev onlaın brıfıng barysynda 1 aqpannan bastap júrgiziletin vaktsınatsııa máselesi týraly aıtty, dep habarlaıdy QazAqparat tilshisi.
Onyń málimetinshe, qańtardyń sońynda Almatyǵa reseılik SPÝTNIK-V vaktsınasynyń 1 450 dozasy (290 quty) kelip túsedi. Emhanalar úshin vaktsınany saqtaýǵa arnalǵan tońazytqysh jabdyqtar men qoımadan vaktsınatsııa kabınetine deıin tasymaldaýǵa arnalǵan tońazytý elementteri bar konteınerler satyp alyndy. Aqpan aıyna 6 myń doza jáne shilde aıyna deıin 150 myń doza alý josparlanyp otyr.
Aıta keteıik, búginde qazaqstandyq QazCovid-in vaktsınasy klınıkalyq synaqtardyń sońǵy satysynan ótip jatyr. Maýsym aıynda synaqtyń 3-fazasynan ótken jaǵdaıda halyqty ımmýndaý úshin emhanalarǵa kelip túsedi.
«Sanıtarlyq-epıdemıologııalyq sharalar talaptaryn saqtaýdyń mańyzdylyǵyn taǵy da atap ótkim keledi. Erteńgi kúni qaıtadan juqtyryp alý qaýpinsiz qalypty ómirge oralýymyz úshin, Almaty qalasynyń barlyq turǵyndaryn saq bolýǵa jáne aldyn alý sharalaryn ustanýǵa shaqyramyn. Búgingi kúni qol jetkizilgen nátıjelerdi paıdalanyp, olardy nyǵaıtý mańyzdy ról atqarady», - dedi Narıman Tabynbaev.
Bul vaktsınalar alǵashqy medıtsınalyq sanıtarlyq kómek uıymdarynyń, ınfektsııalyq aýrýhanalar men statsıonarlardyń, sanepıd baqylaý qyzmetiniń mamandary men jedel járdem qyzmetkerleriniń arasynda taratylady.
«Vaktsına erikti túrde salynady. Eger mamandar qarsy bolsa, salynbaıdy. Ekinshi kezeńinde ekpe muǵalimder, basqa medıtsınalyq qyzmetkerler, esepte turǵan naýqastarǵa jasalady», - dedi ol.
Onyń aıtýynsha, vaktsına «SQ-Farmatsııa» arqyly satyp alynady.
