Koronavırýs: Almatyǵa Germanııadan kelgen ushaqtaǵy barlyq jolaýshynyń jeke tulǵasy anyqtalǵan
ALMATY. QazAqparat - Búgin Almatyda qalalyq qoǵamdyq densaýlyq saqtaý basqarmasynyń basshysy Tileýhan Ábildaev pen qalalyq taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Ásel Halyqova brıfıng ótkizdi, dep habarlaıdy QazAqparat tilshisi.
Tileýhan Ábildaevtyń aıtýynsha, Frankfýrt-Almaty baǵytynda kelgen reıste 68 adam bolǵan.
«Onyń 4-eýi tranzıt arqyly basqa elge ushyp ketken. 40 adam turǵylyqty mekenjaıy boıynsha tabylyp, karantınge alyndy. Bizde barlyq jolaýshy týraly málimet bar, jeke tulǵalary anyqtalǵan», - deıdi Tileýhan Ábildaev.
Al 12 naýryzda Almatyǵa kelgen reıste ekıpajdy qosqanda barlyǵy 12 adam bolǵan. Onyń barlyǵy kelisimen birden oqshaýlandy.
Jalpy alǵanda Almatyǵa 24 aqpan men 13 naýryz aralyǵynda shetelden 11340 adam kelgen. Onyń 95.7%-y ıaǵnı 10852 adam medıtsınalyq mekemeler baqylaýynda tur.
Eske sala ketsek, buǵan deıin basqarma basshysy Almatyda koronavırýspen kúreske qansha qarajat bólingenin jáne koronavırýs juqtyrǵan adamdardyń jaǵdaıyn aıtqan edi.
