Koronavırýs: Almatyda zerthanalar men klınıkalardyń qýaty artady
ALMATY. QazAqparat – Ákimdik janyndaǵy komıssııa koronavırýs ınfektsııasyna qatysty qalyptasqan sanıtarlyq-epıdemıologııalyq jaǵdaıdy eskere otyryp, COVID-19 taralýyna jol bermeý úshin qosymsha sharalardy qabyldady, dep habarlaıdy QazAqparat tilshisi.
Qalalyq ákimdiktiń habarlaýynsha, 22 maýsymnan bastap zerthanalardyń qýattylyǵy artady. Búgingi kúni PTR testileý alty arnaıy mamandandyrylǵan zerthanada júrgiziledi. Táýekel sanatyna jatatyn adamdar ǵana testileýden tegin ótedi. Sonymen qatar, aqyly túrde PTR ádisimen testileýden ótýge bolady.
«Olımp» zerthanasynyń jumysy qaıta qolǵa alynady. 24 maýsymnan bastap «Nurly taý» bıznes ortalyǵy janyndaǵy qorshaýly pýnkti bar zerthana jumysyn bastaıdy. Al, 26 maýsymda «Atakent» aýmaǵyndaǵy táýligine 1 myńǵa jýyq testileý júrgizetin jetinshi zerthana kelýshilerdi qabyldaı bastaıdy.
«KVI juqtyrǵan naýqastarǵa medıtsınalyq kómek qoljetimdi bolýy úshin 22 maýsymnan bastap jedel medıtsınalyq kómek aýrhanasynyń bazasynda burynnan bar 600 provızorlyq oryn janyna taǵy da qosymsha 300 oryn qosylady. Birqatar medıtsınalyq mekemelerdi qosymsha beıimdeý barysynda ınfektsııalyq tósekter sany artady. Almatyda koronavırýs ınfektsııasyn juqtyrǵany rastalǵan patsıentterdi 9 ınfektsııalyq statsıonar qabyldaýda, onda 1409 naýqas em alyp jatyr. Qazirgi kezde 14 naýqastyń jaǵdaıy óte aýyr, 131 patsıent aýyr jaǵdaıda, al 937 naýqastyń jaǵdaıy ortasha»,– dep habarlady ákimdik.
Budan bólek, kópbeıindi statsıonarlar shtatty rejımde jumys istep jatyr. Onda naýqastardy táýlik boıyna qabyldaıdy.
«Ókpeniń qabynýy (pnevmonııa) dıagnozyn der kezinde anyqtaý úshin kompıýterlik tomografııalyq tekserýdi usynatyndardyń reestri jasaldy. Olardyń arasynda memlekettik klınıkalarmen qatar jeke medıtsınalyq qyzmet kórsetetinder de bar. Taǵy 2 kompıýterlik tomografııa qosymsha satyp alyndy. Qalanyń barlyq emhanalarynda rentgenografııa kabınetteri jumys isteýde»,– dep atap ótti ákimdik.
Sımptomsyz naýqastar jaǵdaılarynyń aýyr nemese jeńil ekenin anyqtaý úshin monıtorıng júrgiziledi. Bul ispen ár emhanadaǵy arnaıy oqýdan ótken mobıldi brıgada aınalysady.
«Qalanyń barlyq medıtsınalyq uıymdary qajetti dárilermen qamtamasyz etilgen. Olardyń jetkilikti qory bar. Júzege asyp jatqan osynaý qosymsha pármendi sharalar COVID-19-ǵa qarsy kúrestiń tıimdiligin arttyryp, jaǵdaıdy turaqtandyrýǵa oń yqpalyn tıgizetin bolady»,– delingen habarlamada.
