Koronavırýs: Almatyda vırýsty jańadan juqtyrǵandardyń qaıdan kelgeni anyqtaldy
ALMATY. QazAqparat – Qaziri kezde Almaty qalasynda koronavırýs juqtyrýdyń 48 rastalǵan jaǵdaıy anyqtalyp, 1 adam jazylyp shyqty. Bul týraly Qoǵamdyq densaýlyq basqarmasynyń basshysy Tileýhan Ábildaev onlaın-brıfıng barysynda aıtty, dep habarlaıdy QazAqparat tilshisi.
«Jańadan anyqtalǵan bes adamnyń ishinen tórteýi 26 naýryzda Mınsk-Almaty reısimen ushyp keldi, bireýi 26 naýryzda Máskeý-Almaty reısimen ushyp keldi. Aýyrǵandardyń biri 15 naýryzda Ystanbul – Almaty reısimen ushyp keldi, 18 naýryzda jaqyn baılanys jasaýshy retinde oqshaýlanǵan, bastapqy taldaý qorytyndylary teris nátıje bergen. 2020 jylǵy 26 naýryzda taldaýdy qaıta tapsyrǵan kezde oń nátıje shyqty, osy ýaqyt boıy ol oqshaýlaýda boldy. Jalpy, 45 naýqas jaı-kúıi – qanaǵattanarlyq, ÓJJ apparatyndaǵy áıeldiń jaǵdaıy aýyr jáne 1 balada aýyrlyǵy ortasha dárejede jaqsarýda»,- deıdi Tileýhan Ábildaev.
Qazirgi ýaqytta provızorlyq ortalyqtarda 1099 adam bar, onyń ishinde 72-i – bala. Karantındik ortalyqtarda 471 adam bar. Úı karantıninde 2037 adam.
«Karantındegi barlyq adamnyń dene temperatýrasy qalypty jaǵdaıda, kataraldyq sımptomdary joq. Elge qaısybir elden ushyp kelse de, taldaýlar tapsyrý úshin ekikúndik karantınge ornalastyrylatyndyǵyn esterińizge sala keteıik. Mundaı sharalar halyq arasynda koronavırýstyq ınfektsııanyń taralýyn boldyrmaý úshin qabyldandy. Olardan COVID-19-ǵa taldaýlar alynatyn bolady, eger ınfektsııa rastalmasa, olar úılerine shyǵarylady»,- dep qortyndylady ol.
Eske salaıyq, keshe bir áıel emdelip úıine shyǵarylǵan bolatyn. Ol endi emhana qyzmetkerleriniń 14 kúndik baqylaýymen úıinde bolady.
