Koronavırýs: Almatyda tegin ekspress-testten qansha adam ótti
ALMATY. QazAqparat –Almatyda 15 myńnan astam adam koronavırýsqa test tapsyrdy. Bul týraly Almaty qalasy Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova onlaın-brıfıng barysynda málim etti, dep habarlaıdy QazAqparat tilshisi.
Onyń aıtýynsha, elimizde sáýir aıynyń basynan COVID-19 indetin anyqtaý boıynsha tegin ekspress-testiler ótkizile bastady. Eger testileý oń nátıje kórsetse, PTR-test (Polımerazdy tizbekti reaktsııa) jasalady.
«Jedel testileýden ótkisi kelgen adamdar arnaıy saıtta anketa toltyryp, ótinim beredi. Sodan keıin olar irikteledi. Bul test adamnyń aýyrǵan ne aýyrmaǵanyn anyqtap beredi. Eger ol oń nátıje kórsetse, biz PTR dıagnostıkaǵa jiberemiz», – deıdi departament basshysy.
Sondaı-aq, ol búginde test tapsyrý jalǵasyp jatqanyn atap ótti.
«Búgingi kúnge 15 myńnan astam test jasaldy. Onyń aldynda aıtqanymyzdaı, 122 adamnan KVI anyqtaldy. Búginde buıryqqa sáıkes qarastyrylǵan PTR-testileýdi qajet etetin kontıngentter bar. Onyń ishinde aýyrǵan adamdar, naýqastarmen baılanys jasaǵan adamdar, shetelden kelgen azamattar bar. Biz medıtsınalyq qyzmetkerlerdi de tekserip shyqtyq»,– dedi Aızat Modaqasymova.
Buǵan deıin, QR Densaýlyq saqtaý mınıstrligi Almatyǵa 55 myńnan astam ekspress-test jetkizgeni týraly jazǵan bolatynbyz.
Tegin ekspress-testten kimder jáne qalaı óte alatynyn myna aqparattan kórýge bolady.
