Koronavırýs: Almatyda taǵy birneshe gospıtal ashylady
NUR-SULTAN. QazAqparat – Koronavırýs pandemııasynyń ekinshi tolqynyna daıyndyq sheńberinde Almatyda birneshe gospıtal ashylady. Bul týraly Almaty qalasynyń ákimi Baqytjan Saǵyntaev málim etti, dep habarlaıdy QazAqparat tilshisi.
«Búgingi kúni kovıdpen kúreske 27 medıtsına uıymy tartylǵan. Jalpy tósek qory 6096 oryndy quraıdy. Tósek-oryndardyń bos bolmaýy 90 paıyzdan 50%-ǵa deıin azaıdy. Búgingi málimet boıynsha bul kórsetkish 42%-ǵa tómendedi. Pandemııanyń ekinshi tolqynyna daıyndyq sheńberinde jaǵdaıy aýyr naýqastarǵa arnalǵan birinshi eshelon statsıonarlaryndaǵy ınfektsııalyq tósek oryndaryn 1015 orynǵa kóbeıtemiz», - dedi Almaty ákimi Úkimet otyrysynda.
Sonymen birge, tamyz aıynyń sońyna deıin 500 orynǵa arnalǵan jańa gospıtal paıdalanýǵa beriledi.
«Al qyrkúıektiń ortasyna deıin 300 tósek-orynǵa arnalǵan tez salynatyn taǵy bir modýldik ınfektsııalyq gospıtaldy iske qosamyz. Kelesi aptanyń basynda qurylys alańyna shyǵamyz. 1 qazanǵa deıin eki qonaq úıdiń bazasynda jeke ınvestıtsııalar esebinen 215 tósek-oryndyq tolyqqandy kovıdtik emhanalar qurylatyn bolady. Tamyzdyń sońyna deıin patologoanatomııalyq bıýro iske qosylady», - dedi Baqytjan Saǵyntaev.
Aıta keteıik, Almatyda 10 955 COVID-19 juqtyrý jaǵdaıy tirkelgen. Onyń ishinde 6 341 adam nemese 60% emdelip shyqqan, 73 adam (0,68%) koronavırýstan qaıtys bolǵan.
