Koronavırýs: Almatyda «sımptomdy» naýqastardyń sany artty

ALMATY. QazAqparat – Almatyda «sımptomdy» naýqastardyń sany artty. Bul týraly onlaın brıfıng barysynda qalalyq sanıtarlyq-epıdemıologııalyq baqylaý departamentiniń bastyǵy, qalanyń bas memlekettik sanıtar dárigeri Jandarbek Bekshın málim etti, dep habarlaıdy QazAqparat tilshisi.

«Almatyda «sımptomdy» naýqastardyń salystyrmaly salmaǵy aldyńǵy aptamen salystyrǵanda 94,2 %-dan 95 %-ǵa deıin artty, bul aınalymdaǵy COVID-19 nusqasynyń joǵary patogendiligin kórsetedi»,- deıdi ol.

Sonymen qatar, ol koronavırýsqa neǵurlym beıim kontıngent - 20-dan 60 jasqa deıingi azamattar ekenin atap ótti.

«Kóbine 20-39 jas aralyǵyndaǵy jastar aýyrdy. Olardyń úlesi 33,5 % boldy. 40-59 jas aralyǵynda 25,2% jáne 60 jas jáne odan joǵary – 23,1% tirkelgen, bul barlyq jaǵdaıdyń 82 paıyzy (qalǵan 18% – balalar men jasóspirimder) «, - deıdi Jandarbek Bekshın.

Spıker brıfıng barysynda qalada ınfektsııa juqtyratyn negizi oryndy atady.

«Eń birinshi orynda saýda nysandary - 32 paıyz. Keıin otbasyndaǵy baılanys - 16 paıyz, qoǵamdyq kólikte - 17,1 paıyz. Bazarlar- 13% «, - dedi ol.