Koronavırýs: Almatyda mereke qarsańynda baqylaý kúsheıdi

ALMATY. QazAqparat - Almatynyń Almaly aýdanynda karantın talaptaryn qasaqana buzatyndarǵa sharalar kúsheıtiledi. Bul týraly Óńirlik kommýnıkatsııalar qyzmetinde ótken brıfıngte Almaly aýdanynyń ákimi Serik Qusaıynov aıtty, dep habarlaıdy QazAqparat tilshisi.

«Aýdanda 4 monıtorıngilik top quryldy (2 kúndizgi, 2 túngi). Monıtorıng toptary kún saıyn, kúndiz jáne túnde jumys isteıdi. Sondaı-aq, kúndizgi toptar aýdannyń iri magıstraldy kóshelerinde jolaýshylar kóligine monıtorıng júrgizedi. Qoǵamdyq kólik jolaýshylaryna túsindirý jumystary júrgiziledi, sondaı-aq júrgizýshilerge betperde rejımin saqtaý týraly nusqaýlyq júrgiziledi», - dedi S.Qusaıynov.

Jyl basynan beri Almaly aýdanynda 1155 nysan tekserildi.

QR ÁqbK-niń 425-babyna sáıkes 44 zańdy tulǵaǵa (aıyppul somasy 28 mln teńge) jáne 117 jeke tulǵaǵa (aıyppul somasy 10,2 mln teńge) qatysty sharalar qabyldandy.

Sotqa 7 nysan boıynsha materıaldar berildi. Onyń tórteýine sot sheshimi shyǵaryldy («Fınık» meıramhanasy, «Fızıka» bary, «Pırat» dámhanasy, «Boohouse» bary), 3 nysan boıynsha materıaldar sot qaraýynda («Endorphin» bary, «Gde-to» bary, loto klýb («Topaz-Zabanov E. A.» JK) Seıfýllın dańǵyly 402).

«Jalpy, barlyq kásipkerler rejımdi saqtaıdy. Biraq, keıbir kásipkerler zańdy aınalyp ótip, jumysyn jalǵastyrýda. Biz túngi mekeme ákimshilerimen kúresýdemiz. Bıznestegilerge aıtarym - barlyq epıdemıologııalyq talaptardy saqtaý mańyzdy», - dep eskertti S. Qusaıynov.

Sondaı-aq, ol qala turǵyndaryn atalǵan kásipkerlik sýbektilerine barmaýǵa shaqyrdy.

Aıta ketý kerek, mereke kúnderi monıtorıngilik toptyń jumysy kúsheıtiledi.

«Monıtorıngilik toptar kún saıyn jumys isteıdi, mereke kúnderi toptar qoǵamdyq oryndarda sanıtarlyq-epıdemıologııalyq talaptardy saqtaý boıynsha kúsheıtilgen jumys rejımine kóshedi. Karantın sharalaryn saqtaý úshin mereke kúnderi adamdar kóp jınalatyn jerlerde ýákiletti organdardyń qyzmetkerleri men qoǵamdyq qyzmetkerlerdi qosymsha tartý josparlanýda», - dedi aýdan ákimi.

Sonymen qatar, sanıtarlyq patrýldeý júrgizilip jatyr.

Eger aýdan aýmaǵynda is-sharalar júrgiziletin jáne sanıtarlyq normalar buzylatyn bolsa, mysaly, jumys isteıtin túngi mekemeler jáne basqa da nysandarǵa qatysty shaǵymdardy qabyldaý boıynsha aýdannyń Sanıtarlyq-epıdemıologııalyq baqylaý basqarmasynyń jedel jelisi bar.

Turǵyndar 8701-716-59-25 telefonyna habarlasyp, bolmasa 102 nomerine habarlasa alady.

Esterińizge sala keteıik, qyzyl aımaqtaǵy saýda ortalyqtary, saýda úıleri, saýda jelileri senbi, jeksenbiden basqa kúnderi jumys isteıdi. Qoǵamdyq tamaqtaný nysandary men fýdkorttar tek jetkizip berý jáne saýda úıi aýmaǵynan tys alyp shyǵý qyzmetimen saǵat 10.00-den 24.00-ge deıin ashyq bolady.