Koronavırýs: Almatyda epıdemıologııalyq jaǵdaı turaqtaldy
ALMATY. QazAqparat – Almatyda epıdemıologııalyq jaǵdaı turaqtaldy. Bul týraly Almaty qalasy ákimdiginiń baspasóz ortalyǵynda ótken onlaın-brıfıngte Almaty qalasy qoǵamdyq densaýlyq basqarma basshysy Kamaljan Nadyrov málim etti, dep habarlaıdy QazAqparat tilshisi.
«Búgingi kúni qaladaǵy KVI jaǵdaıy turaqtaldy, sońǵy aıda aýrýshańdyqtyń ortasha ósimi shamamen 2,3%-ǵa, sońǵy aptada ósim 1,1 paıyzdy qurady. Qazirgi ýaqytta Almaty qalasynda tirkelgen KVI jaǵdaılarynyń sany – 2882, onyń ishinde 1875 adam saýyǵyp, emdeýden shyǵaryldy, bul tirkelgenderdiń jalpy sanynyń 65%-yn quraıdy, tek ótken aptada 323 adam emdeýden shyǵaryldy. Ókinishke oraı, ólim-jitim jaǵdaılary da boldy – 10 adam KVI-den qaıtys boldy, osylaısha qazirgi ýaqytta 975 patsıent emin jalǵastyrýda. Medıtsınalyq uıymdar shtattyq rejımde bekitilgen emdeýge jatqyzý algorıtmine sáıkes jumys isteýde»– dedi Qamaljan Nadyrov.
Onyń aıtýynsha, qazir qoǵamdyq densaýlyq basqarmasynyń negizgi kúsh-jigeri medıtsına qyzmetkerleriniń qaýipsiz eńbek jaǵdaılaryn qamtamasyz etýge jáne medıtsınalyq kómek alý kezinde patsıentterdiń qaýipsiz bolýyna baǵyttalǵan. Medıtsına qyzmetkerleri barlyq qajetti jeke qorǵaný quraldarymen qamtamasyz etilgen. Budan basqa, aýrýdyń múmkin bolatyn jańa tolqynyna – kúzgi kezeńine daıyndyq jumystary júrgizilýde.
«KVI-men kúres aıasyndaǵy jumystan basqa, basqarma strategııalyq mindetterdi iske asyrý boıynsha jumys atqarýda. Qala ákimi medıtsınalyq kómektiń sapasy men qoljetimdiligin arttyrý boıynsha birqatar naqty mindetter qoıdy. Osyǵan baılanysty, basqarma 2025 jylǵa deıin qalanyń densaýlyq saqtaý júıesin damytýdyń keshendi josparyn ázirledi. Jaqyn arada atalǵan jospar saraptamalyq qaýymdastyqpen talqylanatyn bolady. Bul josparda aldaǵy qalanyń densaýlyq saqtaý júıesin damytýdyń 5 jylǵa arnalǵan naqty baǵyty aıqyndalatyn bolady. Atap aıtqanda, qalanyń kadrlyq áleýetin taldaý jáne odan ári damytý, biliktilikti arttyrý, jańa tehnologııalardy engizý máseleleri boıynsha jumystar júrgiziletin bolady»,– dep qortyndylady ol.
Buǵan deıin, ol endi bas dárigerdiń ınfektsııalyq baqylaý jónindegi orynbasary bolatynyn aıtty.
