Koronavırýs: Almatyda 22 adamnyń jaǵdaıy aýyr
ALMATY. QazAqparat – Búginge deıin Almatyda koronavırýs ınfektsııasyn juqtyrýdyń 1848 jaǵdaıy tirkeldi. Bul týraly qalalyq Qoǵamdyq densaýlyq saqtaý basqarmasynyń basshysy Tileýhan Ábildaev brıfıng barysynda aıtty, dep habarlaıdy QazAqparat.
Onyń aıtýynsha, keshe qalada vırýsqa shaldyǵýdyń jańadan 46 oqıǵasy anyqtaldy. Onyń 8-i – jergilikti jaǵdaı, 12-si – ınfektsııanyń úıdegi oshaqtarymen baılanysta bolǵan azamattar. Qalǵandary – karantındik jáne provızorlyq ortalyqtarda jatqandar.
«Osy ýaqytta qaladaǵy ınfektsııalyq statsıonarlarda 929 adam emdelýde, onyń 40-y – bala. Eki adamnyń jaǵdaıy – óte nashar, aýyr halde jatyr. 22 adamnyń jaǵdaıy – aýyr, 296 naýqastyń hali – ortasha aýyr. Al qalǵandarynda – qanaǵattanarlyq, olar sımptomdary joq naýqastar», - dedi Tileýhan Ábildaev.
Sondaı-aq, ol Almatyda jazylyp shyqqan azamattardyń sany 910 adamǵa jetkenin, búgin taǵy 50 adamdy aýrýhanadan shyǵarý josparlanǵanyn aıtty.
«Provızorlyq gospıtaldarda 251 adam bar, onyń 6-ýy bala. Karantındik oqshaýlaýda 260 adam, úı karantıninde 13 087 adam baqylaýda», - dedi ol.
