Koronavırýs: Almaty aýrýhanalary bir táýlikte qansha naýqas qabyldaı alady

ALMATY. QazAqparat – Almaty qalalyq Qoǵamdyq densaýlyq saqtaý basqarmasynyń basshysy Kamaljan Nadyrov koronavırýs ınfektsııasy órshigen jaǵdaıda aýrýhanalar bir táýlikte qansha naýqasty qabyldaı alatynyn aıtty, dep habarlaıdy QazAqparat tilshisi.

Onyń aıtýynsha, statsıonarlyq 6 myń tósek-ornyna táýligine 350 adamnan artyq jatqyzý – densaýlyq saqtaý júıesiniń kollapsyna alyp kelýi múmkin.

«Biz matematıkalyq esep júrgizdik. Statsıonarlyq ortalyqtardyń júktemesine birneshe faktor yqpal etedi. Oǵan – juqtyrýlar sany, túsken naýqas sany, naýqastardyń aýyrlyq dárejesi, olardyń tósek-orynda jatý ýaqyty jatady. Sáýir-mamyr aılarynda táýligine orta eseppen 100 patsıent tússe, indettiń sharyqtaý sheginde 300-500 adamǵa deıin jatqyzyldy. Bul kórsetkish medıtsınalyq mekemelerimizge úlken aýyrlyq týdyratyny anyqtaldy. Sondyqtan, patsıentter aǵynyn retteýdiń qajettiligin túsindik. Táýligine 500 adam – Almaty densaýlyq saqtaý júıesi úshin krıtıkalyq núkte ekeni anyqtaldy. Bul kórsetkishten asqan jaǵdaıda, ýaqytynda sharalardy qolǵa almaǵan jaǵdaıda qalada medıtsınalyq kollaps bastalýy yqtımal. Sebebi, oryn sany shekteýli», - dedi Kamaljan Nadyrov.

Basqarma basshysy osy baǵytta tósek-oryn qoryn tıimdi paıdalaný qolǵa alynatynyn aıtty.

«Medıtsınada oryn qorynyń aınalymy degen bolady. Statsıonarlarda bir aıda bir orynda 3 patsıent jatyp shyǵýy tıis. Bul tósek-oryndardy tıimdi paıdalandyq degen sóz. Sondyqtan, krıtıkalyq núkteni asyp ketý – bizdiń densaýlyq saqtaý júıesi úshin óte tıimsiz. Biz táýligine 350 patsıent degen shekti kórsetkishti ustap turýymyz kerek», - dedi ol.

Aıta ketý kerek, pandemııanyń sharyqtaý shegi bolǵan shilde aıynda Almaty medıtsınalyq mekemelerinde oryn tapshylyǵy týyndady.