Koronavırýs: Almaty aýmaǵynda 27 beket ornatylady
ALMATY. QazAqparat – Almaty ákimi Baqytjan Saǵyntaev turǵyndarǵa jarııalaǵan úndeýinde qalanyń shekarasyn kúzetýge 27 beket ornatylatynyn aıtty, dep habarlaıdy QazAqparat tilshisi.
«Tez tarap jatqan vırýs bizdi jyldam sheshim shyǵarýǵa májbúr etýde. Sondyqtan men tótenshe jaǵdaı rejimin qamtamasyz etý jónindegi memlekettik komıssııaǵa qalada karantın engizý týraly usynys engizdim. Bul sheshim 1 saǵat buryn qabyldandy. Qalada karantın 19 naýryzda túngi saǵat 00:00-de engiziledi. Almatydaǵy karantınniń basty maqsaty - ınfektsııanyń tez taralýyn toqtatý. Azamattar men avtokólik quraldaryn Almatyǵa kirip shyǵýyn shekteý úshin Almatyǵa kireberisterde 27 blok beketi ornatylady. Blok beketterinde polıtsııa patrýldik polkiniń, Qorǵanys mınıstrliginiń, Ulttyq gvardııa bólimsheleriniń kúshteri jumyldyrylady», - dedi Baqytjan Saǵyntaev.
Sonymen qatar, qala ákimi qalada trotýarlardy jýý jáne dezınfektsııalaý arqyly juqtyrý oryndaryn buǵattaýdy qolǵa almaq. Turǵyn úılerde sanıtarlyq epıdemıologııalyq dezınfektsııalaýdy kúsheıtý jáne irgeles aýmaqtardy sanıtarlyq tazalaý júzege asady.
Aıta ketý kerek, karantın rejimi 19 naýryzda túngi saǵat 00:00-de iske qosylady.
