Koronavırýs: Almaty «Ashyq» qosymshasyn qoldanýda kósh bastap tur

ALMATY. Qazqparat - Almaty, Nur-Sultan jáne Qaraǵandy qalalarynda 17 qańtardan bastap «Ashyq» pılottyq jobasynyń birinshi kezeńi júzege asyrylýda. Mekemege kelýshilerdiń koronavırýsqa qatysty mártebesin anyqtaıtyn qosymshany qoldaný boıynsha Almaty kósh bastap tur. Bul týraly onlaın brıfıng barysynda qalalyq kásipkerler palatasynyń dırektory Aıtýar Qoshmambetov aıtty, dep habarlaıdy QazAqparat tilshisi.

Koronovırýs ınfektsııasynyń taralýynyń aldyn alý jáne kásipkerlik obektilerinde shekteý is-sharalaryn engizý kezeńinde olardy qoldaý maqsatynda «Ashyq» pılottyq jobasyn iske asyrý bastalǵan bolatyn.

Aıtýar Qoshmambetovtyń aıtýysha, 22 qańtardan bastap «Ashyq» qosymshasy Infokazakhstan.kz platformasymen biriktirildi. Platforma arqyly qatysýshy ótinim berip, QR kod ala alady.

17 naýryzdaǵy jaǵdaı boıynsha, «ASHYQ» qosymshasyn 32 808 qoldanýshy júktep alǵan.

Mekemelerge barlyǵy 233 QR kod berildi:

Nur-Sultan qalasy - 62 QR (pılottyq jobaǵa qatysýshylar sany 35);

Almatyda - 110 QR (pılottyq jobaǵa qatysýshylar sany 52);

Qaraǵandy qalasy boıynsha - 34 QR (pılottyq jobaǵa qatysýshylar sany 16).

«QR bas memlekettik dárigeriniń 2021 jylǵy 26 aqpandaǵy №7 qaýlysymen Nur-Sultan, Almaty jáne Qaraǵandy qalalaryndaǵy kásipkerlik obektilerinde «Ashyq» mobıldik qosymshasyn engizý boıynsha pılottyq jobany júrgizý týraly sheshim qabyldandy»,- deıdi Aıtýar Qoshmambetov.

«Ashyq» pılottyq jobasyn kelesi kásipkerlik nysandarda iske asyrýǵa ruqsat etilgen:

1) fıtnes-klýbtar;

2) spa ortalyqtary;

3) saýnalar, basseınder;

4) kompıýterlik klýbtar (18 jasqa deıingi tulǵalardy qospaǵanda);

5) boýlıng klýbtary.

Bul rette Nur-Sultan, Almaty, Qaraǵandy qalalarynda pılottyq jobaǵa qatysatyn kásipkerlik sýbektileri kelesi sharttardyń oryndalýyn qamtamasyz etýi qajet:

- Jobaǵa qatysatyn kásipkerlik nysandaryna kelýshilerdi kirgizý kireberiste ornalasqan QR-kodty skanerlegen jaǵdaıda ǵana iske asyrylady (kelýshiniń mártebesin aıqyndaý úshin)

- «jasyl» tústi mártebe - kelýshi derekter bazasynda covid-19-ǵa teris nátıjemen PTR-testileýden ótken retinde belgilengen;

- «kók» tústi mártebe - PTR-testileý nátıjesi joq, covid-19 juqtyrǵan naýqaspen baılanysta bolmaǵan;

- «sary» tústi mártebe - derekter bazasynda covid-19 juqtyrǵan naýqaspen baılanysta bolǵan;

- «qyzyl» tústi mártebe – derekter bazasynda covid-19 oń nátıjesimen tirkelgen.

Kelýshide smartfon bolmaǵan jaǵdaıda kásipkerlik obektisiniń qyzmetkeri kelýshiniń mártebesin onyń kelisimimen aqparattyq júıede tekseredi.

«Sary» (covid-19 juqtyrǵan naýqaspen baılanysta bolǵan), «qyzyl» (COVID-19-ǵa oń nátıjesimen tirkelgen) mártebesine sáıkes oqshaýlaýǵa jatatyn tulǵalar pılottyq jobaǵa qatysatyn kásipkerlik obektilerine kirýine jol berilmeıdi.