Koronavırýs: Almaty ákimi jedel testten kimderdiń ótetinin aıtty
ALMATY. QazAqparat – Almaty ákimi Baqytjan Saǵyntaev jedel testten kimderdiń ótetinin aıtty, dep habarlaıdy QazAqparat tilshisi.
«Koronavırýs indetimen kúrestegi mańyzdy kezeńniń biri – áleýetti naýqastardy izdeý men anyqtaýǵa belsendi kirisý. Basqa elderden kelgen naýqastar jáne olarmen baılanysta bolǵan azamattar anyqtalǵannan keıin mindetti testileýge jatatyn jandardyń aıasy keńeıdi. «Jedel járdem», emhanalar men aýrýhanalardyń qabyldaý bólmelerindegi, provızorlyq statsıonarlar men zerthanalardaǵy medıtsına qyzmetkerlerine erekshe kóńil bólinedi. Sanepıdemıologtar sııaqty olar da únemi testileýden ótedi»,– dep jazdy Baqytjan Saǵyntaev Instagram -daǵy paraqshasynda.
Sondaı– aq ol medıtsına qyzmetkerleri, polıtseıler, áskerı qyzmetshiler men blok-bekettegi memlekettik organdardyń qyzmetkerleri de tekserýden óttetinin atap ótti. Sondaı-aq testten ótýge respıratorlyq aýrý belgileri bar, ókpe qabynýymen (pnevmonııa) aýyratyn jáne tynys alý organyndaǵy syrqatymen esepte turǵan qala turǵyndary da qamtylmaq. Sonymen qatar, jedel testileýden qalanyń qalypty tirshiligin qamtamasyz etetin qyzmetter men kásiporyndarynyń jumysshylary da ótetin bolady.
«Vırýstyń jasyryn oshaǵyn der kezinde anyqtaý arqyly qaladaǵy epıdemıologııalyq jaǵdaıdy baqylaýda ustaýǵa múmkindik bar. Bizdiń mindetimiz – qaýipti indettiń órship ketýine jol bermeý»,– dep atap ótken qala ákimi.
