Koronavırýs álemdik retsessııany iske qosatyn mańyzdy trıgger emes – Erbolat Dosaev

ALMATY. QazAqparat – QR Ulttyq bank tóraǵasy Erbolat Dosaev Qytaıdaǵy koronavırýstyq indet álemdik ekonomıkaǵa qalaı áser etýi múmkindigine qatysty pikirimen bólisti, dep habarlaıdy QazAqparat tilshisi.

«Daǵdarysqa qarsy túrli josparlar jasaldy. Bizde aldyńǵy jyldarǵa jospar qurý boıynsha tájirbıemiz mol. Ótken jyldyń sońynda Úkimetpen birge qazirgi jaǵdaıdy eskere otyryp, baǵdarlamalardy jańarttyq. Atap aıtar bolsaq, munaı baǵasynyń tómendeýi, saýda kedergilerin eskerý stsenarııi boıynsha Úkimet pen Ulttyq bankte jospar bar», - dedi búgin Almatyda ótken brıfıngte Erbolat Dosaev.

Onyń aıtýynsha, búginde álem ekige bólindi: biri – túbegeıli, koronavırýstyq indet jahandyq ekonomıkalyq quldyraýdyń qozdyrǵyshy bolady dep sanasa, ekinshi tarap Qytaı úkimeti qysqa merzimde juqpaly aýrýdy jeńedi degen oıda.

«Búkil álemdi lokalızatsııa qyzyqtyrady. Bul másele tek qytaılyq problema emes jáne ony bári jaqsy túsinedi. Sondyqtan, meniń oıymsha, álemdik qaýymdastyq Qytaı ekonomıkasynyń damý turaqtylyǵyna múddeli. Búgingi tańda bizge qajetti sheshimder qabyldaý úshin ulttyq ekonomıkalyq múddelerdi qorǵaý aıasynda oqıǵalar men máselelerge muqııat baqylaý júrgizý qajet. Menińshe, koronavırýs álemdik retsessııany iske qosatyn mańyzdy trıgger emes. Qazirgi josparlarmen salystyrǵanda Slowdown bolýy múmkin, biraq bir aı ǵana ótti», - dedi Ulttyq bank basshysy.