Koronavırýs: álemdegi ahýal
NUR-SULTAN. QazAqparat – Brıtanııa ǵalymdarynyń zertteý nátıjesine sáıkes, koronavırýspen aýyrǵan adamda ımmýnıtet kem degende bes aıǵa deıin saqtalady. Sondaı-aq qaıta juqtyrý yqtımaldyǵy alǵashqyǵa qaraǵanda 83% tómen bolady, dep habarlaıdy QazAqparat BBC-ge silteme jasap.
Jalpy, adam aǵzasynda ımmýnıtet saqtalatyn ýaqyt áli de naqty belgisiz.
Ótken jyldyń maýsymy men qarashasy aralyǵynda júrgizilgen zertteýde koronavırýs juqtyrǵan brıtandyq densaýlyq saqtaý júıesiniń 6614 qyzmetkeriniń derekteri baqylandy. Osy naýqastardyń tek 44-i qaıtadan vırýs juqtyrǵan.
Ǵalymdardyń aıtýynsha, mundaı statıstıka úmit syılaǵanymen, qaıta juqtyrǵan adam alǵash vırýsqa shaldyqqan adam tárizdi juqpaly bolýy múmkin. «Eger siz aýrýdy jeńip, endi qaýipsizbin dep oılasańyz, sizde aýyr derttiń týyndaý qaýpi tómen bolǵanymen, ınfektsııany basqa adamǵa juqtyra alasyz», - dep túsindirdi zertteý avtorlarynyń biri Sıýzan Hopkıns.
Osyndaı qorytyndylardy nazarǵa alǵan Brıtan bıligi barlyq azamattar úıde otyrý kerek dep esepteıdi.
Oǵan qosa, ımmýnıtettiń bes aıǵa deıin ǵana saqtalatynyn eskersek, ótken jyldyń kókteminde, pandemııanyń alǵashqy tolqyny kezinde aýyrǵan adamdar qaıtadan qaýip tobyna enip otyr.
Aýstralııa Oksford vaktsınasynyń tıimdiligine kúmán keltirýde
Aýstralııalyq ǵalymdar toby el úkimetin ımmýnızatsııa strategııasyn qaıta qaraýǵa shaqyryp jatyr. Olardyń pikirinshe, Oksford ýnıversıteti men AstraZeneca kompanııasy óndirgen vaktsına ujymdyq ımmýnıtet qalyptastyrý úshin tıimsiz.
Immýnologııa salasyndaǵy birneshe maman jáne oppozıtsııalyq leıborıstik partııa ókilderi synaq kezinde anaǵurlym joǵary tıimdilik kórsetken BioNTech/Pfizer jáne Moderna vaktsınalaryn satyp alý úshin kúsh sala beretinin málimdedi. Densaýlyq saqtaý salasynyń jekelegen sarapshylary da kelesi aıdan bastap AstraZeneca preparatymen vaktsınalaýdy toqtatý kerektigin basa aıtýda. Degenmen bul usynysty Kanberradaǵy bılik maquldamady.
Aýstralııa medıtsına qaýymdastyǵynyń (AMA) prezıdenti Endrıý Mıllerdiń aıtýynsha, AstraZeneca vaktsınasynyń basqa preparattar sııaqty tıimdi ekeni týraly derek joq, sol sebepti jappaı ımmýnıtet qalyptaspaýy múmkin. Mıller preparatty qoldanýǵa asyqpaýǵa shaqyrdy.
Onyń túsindirýinshe, AQSh jáne Ulybrıtanııamen salystyrǵanda Aýstralııa pandemııa jaǵdaıyn baqylaýda ustap otyr. Halyqtyń úmitin aqtap, eldi eń tıimdi vaktsınamen qamtamasyz etý úshin vaktsınalaý protsesin ýaqytsha toqtata turýǵa múmkindigi bar.
Degenmen Aýstralııa bıligi Oksford ýnıversıteti men AstraZeneca kompanııasynyń vaktsınasy vırýstan qorǵaıtynyna senimdi jáne josparyn ózgertpeıtinin aıtty. «AstraZeneca vaktsınasy tıimdi, qaýipsiz jáne sapasy joǵary», - dedi Aýstralııanyń bas sanıtarııa dárigeri Pol Kellı. Aýstralııa 54 mln AstraZeneca vaktsınasyn satyp alǵan.
Aıta ketsek, synaq kezinde qatelik ketkeni týraly málimet paıda bolǵannan keıin preparatqa degen senim azaıdy: eriktilerdiń bir bóligi hattamada kórsetilgendeı eki birdeı doza emes, bir jarym ekpe alǵan jáne aldyn ala málimet boıynsha solardyń ekpesi tıimdirek bolǵan. Hattamada kórsetilgen eki doza vırýstan 62% deıin qorǵaı alady, bul Pfizer jáne Moderna (tıimdiligi 90%-dan joǵary) preparattarymen salystyrǵanda aıtarlyqtaı tómen.
