Koronavırýs: Álem elderindegi jaǵdaı qandaı
NUR-CULTAN. QazAqparat – Italııada koronavırýstan 13 915 adam kóz jumdy. Bul týraly QazAqparat Memlekettik komıssııanyń shuǵyl shtabyna silteme jasap habarlaıdy.
Italııada jańa koronavırýstan bolǵan aýrýdan jáne onyń saldarynan qaıtys bolǵandardyń sany táýligine 760 adamdy qurady, pandemııa bastalǵannan beri 13 915 adamǵa jetti. Bul týraly beısenbi kúni Azamattardy qorǵaý departamentiniń basshysy Andjelo Borrellı habarlady.
Horvatııada jańa koronavırýs ınfektsııasyn juqtyrǵandar sany 1 011-ge jetti. Qazirgi ýaqytta bul elde 35 naýqas ókpeni jasandy jeldetý apparattaryna qosylǵan.
Reseıde sáýir aıynda tolyǵymen jumyssyz kúnder bolady dep jarııalandy. Bul elde 3500-den astam adam juqtyrǵan koronavırýstyń taralýyna baılanysty demalys kúnderin uzartý týraly sheshim qabyldandy.
Kanadada koronavırýsty juqtyrǵandar sany 10 myń adamnan asty. Qazirgi tańda Kanadada koronavırýstyń aǵzada bar-joqtyǵyna baılanysty 257 myńǵa jýyq adam tekserildi, 127 ólim-jitim tirkeldi.
Taıland 3 sáýirden bastap jalpyulttyq komendanttyq saǵatty engizedi. Ol jergilikti ýaqyt boıynsha 22:00-den 04:00-ge deıingi aralyqta bolady.
Ázerbaıjan bıligi koronavırýsqa baılanysty adamdardyń qozǵalysyna shekteý engizýde. Turǵyndar úıden úsh jaǵdaıda ǵana shyǵa alady: medıtsınalyq kómek qajet bolǵan jaǵdaıda; kúndelikti suranystaǵy ónimder men azyq-túlikti, dári-dármekterdi satyp alýǵa, bank jáne poshta qyzmetterin paıdalanýǵa; týysynyń jerleýine qatysýǵa. Osy maqsatta SMS-habarlama jiberý qajet.
