Koronavırýs: Aqtóbedegi shekara beketterinde oqshaýlaý orny jabdyqtaldy
AQTÓBE. QazAqparat – Koronavırýsqa qarsy aldyn alý sharasy kúsheıtilip, shekara beketterinde oqshaýlaý oryndary ashyldy, dep habarlaıdy QazAqparat tilshisi.
Aqtóbe oblystyq densaýlyq saqtaý basqarmasy, oblystyq taýarlar men kórsetiletin qyzmetterdiń sapasyn jáne qaýipsizdigin baqylaý departamenti koronovırýsqa qarsy jumystardy pysyqtady. Aqtóbe qalasyndaǵy halyqaralyq áýejaı men temirjol vokzalynda sanıtarlyq-epıdemıologııalyq baqylaý kúsheıtilgen.
«Mártók aýdanynyń Jaısań jáne Qarǵaly aýdanynyń «Álimbet» shekara mańyndaǵy avtomobıl ótkizý beketterinde ýaqytsha sanıtarlyq-karantındik pýnktter uıymdastyryldy. Búgingi kúni 14 myńnan astam adamnyń qyzýy ólshendi. Qyzýy joǵary jáne densaýlyǵy nashar adamdar anyqtalǵan joq. Jyl basynan beri Qytaı jáne osy elge barǵan Qazaqstan azamattary monıtorıngke alyndy. Olardyń sany 200-den asady. Baqylaýda bolǵan adamdardyń 99% din aman, vırýs anyqtalmaǵan soń baqylaý alyndy»,- dedi oblystyq taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Nursulý Berkimbaeva.
Onyń aıtýynsha, óńirdegi dárihanalarda 52 myń betperde bar.
«Áleýmettik jeli arqyly jalǵan aqparat kóp tarap jatyr. Resmı túrde aıtarymyz – elde koronavırýstyq ınfektsııaǵa baılanysty jaǵdaı turaqty. Oblysta 396 kereýet, ıaǵnı, eki emdeý orny daıyn tur. Dári-dármek jetkilikti. Medıtsına qyzmetkerlerine qajetti qorǵanys kıimderi bar. Arnaıy shtabtyń jumysy kezinde shetelden kelgenderdiń bári baqylaýǵa alyndy», - dedi oblystyq densaýlyq saqtaý basqarmasynyń basshysy Áset Qalıev.
