Koronavırýs: Aqtóbede joǵary oqý oryndarynyń jataqhanalary rezervke daıyndaldy
Aqtóbe oblysy boıynsha epıdemıologııalyq jaǵdaı turaqty. Merekege deıin balalardyń 30 paıyzy ǵana balabaqshaǵa barǵan. Onlaın tártipte turǵyndar suraǵyna jaýap bergen oblys ákiminiń birinshi orynbasary Nurjaýǵan Qalaýovtyń aıtýynsha, sanıtarlyq talaptar saqtalǵan, balabaqsha jumysyn ári qaraı da jalǵastyra beredi.
«Memleket basshysy tegin betperde taratýdy aıtqan bolatyn. Aýdandardaǵy sheberhanalar tigip, tegin berip jatyr. Aldaǵy ýaqytta gýmanıtarlyq kómek te keledi. Al avtobýstarǵa keler bolsaq, bári zalalsyzdandyrý jumystaryn júrgizip jatyr. Tótenshe jaǵdaıǵa baılanysty oblysta 2 mıllıard teńge bólindi. Sonymen qatar qorlar jumys istep jatyr», - dedi oblys ákiminiń orynbasary Nurjaýǵan Qalaýov.
Oblys boıynsha 22 adam statsıonarda jatyr. Shetelden kelgenderdiń ózgesi úıden baqylaýǵa alyndy.
«Medıtsınalyq mekemelerde 5 myń oryn bar. Sonymen qatar, joǵary oqý oryndaryndaǵy jataqhanalarynda 2200 oryn daıyn. Rezervte bilim salasy mekemelerinen taǵy 5 myńnan astam oryn ázirlendi. Reseımen arada 4 shekara beketi bar. Úsheýi avto, bireýi temirjol beketi. Jaısań, Qarashataý, Álimbet avto beketi men Jaısań temirjol beketindegi shekarashylar qajetti qural-jabdyqpen, maskamen qamtamasyz etilgen. Sanıtar mamandar da bar. Halyqaralyq marshrýttar toqtady, tek júk kólikteri júre alady. Temirjol men áýejaı da baqylaý kúsheıdi. Qazir tek Aqtaýdan keletin reıs qaldy, ózgesine ýaqytsha shekteý qoıyldy», - dedi N. Qalaýov.
Onyń aıtýynsha, azyq-túlik baǵasynyń keıbiri ósti. Bul ımporttyq ónim.